Mi zawng zawng ka ti lawm thei lo - Joshua

IBF, WBO leh WBA world heavyweight champion ni lai Anthony Joshua chuan Pathianni zing khan Wembley Stadium-ah Alexander Povetkin a hmachhawn dawn a, Deontay Wilder hmachhawn tura ngaih a nih laia boxer hriat hlawh lo zawk a hmachhawn tur hian sawi a hlawh hle.

Mahse, Joshua chuan amah sawiseltute chhangletin, "Mi zawng zawng lawmna ka thlen thei lo tih ka hria a, ka duhdana kal mai hi ka thlang. Fight 16 ka hmachhawn hman chauh tih khan world title ka fight tawh a, kum thum chhung amateur ka ni a, Olympics-ah gold ka la bawk. Mahse, chu pawh chu a la tawk zo lo," tiin mi tam tak chuan amah sawiselna ngawr ngawr an zawn thu a sawi.

Kum 28 mi fighter hian vawi 21 inhnek a hmachhawn tawhah hnehna la chang vekin a knock out vek a, IBF, WBO leh WBA world heavyweight kawnghren a kawl mek.

Pathianni zinga Joshua hmachhawn tur Alexander Povetkin hi kum 39 mi a ni tawh a, vawi 35 fight a hmachhawn tawhah vawi 34 hnehna changin a record a chhe bik lo hle.

Hetihlai hian Joshua chuan Wilder emaw Tyson Fury a hmachhawn tho tur thu sawiin, "April 13 atan Wembley kan book fel leh der tawh a, tu nge ka hmachhawn dawn a la chiang lo. Wilder emaw Tyson Fury pawh ni se, ka hmaa ding ngam fighter ka hmachhawn ang," tiin a sawi.