Tu nge Liverpool dang thei ang?

2018-19 season-ah Liverpool hneh thei an la awm lo. Premier League match nga zet an chak zawn hnuah Champions League-ah Liverpool an chak chhunzawm a, Thawhlehni zan khan an mikhual Paris St-Germain chu 3-2 in an hneh.

Liverpool hian an mikhual hneh turin injury time an nghah thlen a ṭul thung a, an goal hnih thun an insût zawhtir hnuah substitute Firminho goal an chakpui.

Liverpool tan an fixture thlirin September hi 'thla harsa' tia sawi ni mah se Jurgen Klopp-a'n inelna hautak duha football khel an nih thu a sawi a, Tottenham Hotspur leh PSG a zawnin an hneh ta.

Liverpool tan Daniel Sturridge, James Milner leh Roberto Firmino ten goal khat ṭheuh an khung a, PSG tana Thomas Meunier leh Kylian Mbappe te goal khung chu Anfield-a point hlawhchhuah nan a tawk zo lo.

Mohamed Salah chuan Liverpool tan goal a khung niin inngai mah se referee-in foul a ham a, Egyptian forward-in goal a khung hmaa Sturridge-a'n PSG keeper Alphonse Areola a tlawh hman chu goal pawm lohna chhan atana tling tawkah a ngai.

Neymar-a'n Liverpool nen an intawn hmain Premier League champion thei zingah Reds a sawi tel lo a, Merseyside club a dah sang lo - Anfield-ah Neymar a langsar lo a; nimahsela an goal hnihna hi a thawhrah a ni.

Hei le Sturridge
Kum 2013 chho kha chuan Liverpool striker ropui ber pawl ni turin Sturridge chungah beiseina a awm a, khawvelin English striker ropui ber pawl indin chho mek an hmu niah an inngai.

Mahse, hliam vangin Sturridge a buai a, 2013-14 season-a Reds tana goal 23 ngawt a khung chu tun thlengin season khata a goal khung hnem ber a ni ta reng - mahse Sturridge a beidawng ve lo.

Roberto Firmino inhliam avangin March 2012 hnua a vawi khat nan Champions League-ah inkhel bul ṭantir a ni a, a dam ṭhat phawt chuan striker 'class' tak a ni tih a pholang chhunzawm.

Kum 29 mi striker hian minute 30-naah Andrew Robertson-a ball siamsak chu ṭha zetin a tauh lut a, goal khung turin theihna sang tak a la nei reng tih hmuh turin a awm - second half-ah hun ṭha tak a nei bawk.

Liverpool boss Jurgen Klopp chuan, "Daniel khan game ṭha chungchuang bik a khel a ni. Inkhelh hma khan amah ka hriat hnuah tun hi a in fit ber ṭum a nih thu leh tun hi chumi chhawr ṭangkai hun a nih thu chu ka hrilh a, game ṭha chungchuang khelin goal ṭha chungchuang a rawn khung ta a ni," tiin a striker a fak.

Midfield hmuhnawm
German coach Klopp chuan 4-3-3 formation hmangin Jordan Henderson, Georginio Wijnaldum leh James Milner te a inkawp tir a, an khel ṭha takzet.

Inkhelh ṭan hmain Liverpool tlarhma Mohamed Salah, Sadio Mane leh Roberto Firmino chu PSG tlarhmaa Edinson Cavani, Mbappe leh Neymar te nen khaikhin an ni a, Liverpool tlarhma ten French club tlarhnung an tih chi ai fo laiin PSG tlarhma erawh Reds midfield-in an chelh a, hun ṭha an nei meuh lo.

Liverpool-in 52% ball changa shot vawi 17 ngawt an neih laiin PSG hian shot vawi kua bak an nei thei lo. Goal hmahruai an khung aṭanga minute ruk liam hnu lawkah Liverpool hian chance duhawm an nei lehnghal a, an midfielder-te thawhrah a ni.

Wijnaldum chu penalty area-ah tih tluk a ni a, Liverpool-in penalty an hlawh chhuak. Reds tan khel ṭha em em mai James Milner a rawn pek chhuak a, kum 32 mi midfielder hian harsatna nei loin goal-ah a chantir.

Bobby leh mit!
PSG-in Meunier leh Mbappe hmangin an si phurh an rawn sut zo a, French rawlthar duhawm Mbappe-a'n French club goal hnihna a khung hian hun tawp nan minute sarih chiah a awm tawh a, PSG-in phu lo chungin point an hlawh chhuak dawn niin a lang hman.

Mahse, Liverpool-in PSG neih loh an nei a, a hming chu Roberto Firmino a ni. Brazilian forward hian Spurs nen an inhmachhawn ṭumin a mitah hliam a tuar a, bench-ah dah a ni. Mahse, Klopp-a'n goal an mamawh belh tih hriain a striker hi minute 72-naah a luhtir a, a tisual lo.

Brazil international hian hun pek belhah Liverpool chakna goal a khung a, Anfield thawm chu ring tak a ni - a mit lehlam hup chungin Bobby-a'n a goal khung a lawm a, tun season-a la tlawm lo Liverpool hnehna a chanpui leh ta.

Klopp chuan, "Kar hmasa lawkah a inhliam a, tunah a rawn dam leh ta. Daniel thlak turin Bobby a rawn lut thei a ni," tiin a squad chhah thu a sawi a, "Bobby ṭhatna hi chu sawi zawh mai theih pawh a ni lo," a ti zui.

Jurgen Klopp a hlim
Champions League nomawi chawi tum PSG mikhualin an hneh thei a, Jurgen Klopp tan lawm lohna chi a ni lo. Liverpool boss chuan, "Game ṭha tak kan khel a, position tinah khan kan ti ṭha em em vek ringawt mai a ni.

"Team inlungrualna ṭha leh chak duhna thinlung hi thil pawimawh ber chu a ni a, player 11 zawng zawng kha an khel ṭha vek a ni. Team ṭha tak kan hmachhawn a, ṭha takin kan khel a ni," a ti. Thomas Tuchel tan erawh lawmna tur a awm lo. Borussia Dortmund a enkawl laia Anfield-a lo tlawm tawh coach chuan, "Kan result khan game a hrilhfiah lo. Goal hnih kan chhuah hmasa ngei a, mahse kan inrintawkna erawh kan hloh lo.

"Anfield a ni miau a, second half-ah kha chuan kan khel chhe hret pawh a ni mai thei. Klopp hian he team hi kum li a enkawl tawh a, kha kha Liverpool khelh dan chu a ni," a ti a, Klopp aiin a team a hriatchian loh zawk thu a sawi zauh.