Chanmari dâl tum tur BVT

Zanin dar 7:00 hian Mizoram Premier League vawi hnih champion tawh Chanmari FC leh Bethlehem Vengthlang FC an inkhel dawn. BVT-in match hniha point an la hmuh loh avangin fimkhur zawka an khelh a ṭul ang.

Hei le, Zama
Khelo India best player Lalnunzama'n an veng club Chanmari FC tan hming a chher chho mek a, MPL match hmasa pahnihah bul ṭan ve vein palian lo mah se a goal hnih hi a lu hmanga a khung ve ve a ni.

Chanmari FC-in season ṭan hma inelnaa an chhawr Lalrammuana leh MC Malsawmzuala te MPL-a an chhawr zui loh avangin Zama chungah mawhphurhna a tla a, coach Lalruatliana Sailo-in a la naupan vangin pressure pek duh lo mah se rin tur dang a nei lo.

BVT lakah pawh Zama hi thlir bik turte zinga mi a ni dawn a, chutihrualin winger ṭha pahnih Vanlalbiaa Chhangte leh Lalmuanzova te an dam ṭha tawh a, Chanmari FC tlarhma a hriam sawt dawn. Heng player tlan chakte ball pe tur hian midfielder tawnhriat nei ṭha Lalnuntluanga a rawn kir bawk ang.

BVT hi le...
Bethlehem Vengthlangin coach H. Lalhlimpuia kaihhruaina hnuaiah point an la hmu lo a, amaherawhchu an khelh dan aṭanga thlir chuan player leh coach ni kawp Hlima'n fak a phu.

BVT hian huaisen takin attacking football an khel a, Mizoram Police laka an chak lohna zat chu goal khat chauh a ni a, Chhinga Veng lakah goal khata hma an hruai hnuah an inlehthal tir bawk. BVT hi an khelh dan thlirin point hmuh an phu a, chutihrualin an match pahniha an chak loh chiah chiahna chhan hi an vanduai piah lamah tawnhriat an neih tlem tiin a sawi theih bawk.

Chhinga Veng an hneh loh ṭumin Hlima a inlan thei a, MPL5 best defender a luh chiah hian Jonathan Lalhriatkima chuan goal nawr kawngah a pui thung. Team fakawm rawlthar rual BVT hian Chanmari lakah risk an la nghal dawn nge tlarhnung an tichhah dawn tih chu zaninah a chiang ang.

ROUND 3
September 20, Ningani
Chawnpui 03:00 PM Electric Veng
Chanmari FC 07:00 PM Bethlehem VT
September 21, Zirtawpni
Chhinga Veng 04:00 PM Ramhlun North
Mizoram Police 07:00 PM Aizawl FC

# Team Pld W D L GF GA GD Pts
1 Chhinga Veng FC 2 2 0 0 3 1 2 6
2 Electric Veng FC 2 2 0 0 3 1 2 6
3 Chanmari FC 2 1 1 0 4 2 2 4
4 Mizoram Police 2 1 0 1 1 1 0 3
5 Aizawl FC 2 0 1 1 3 4 -1 1
6 Chawnpui FC 2 0 1 1 1 2 -1 1
7 Ramhlun North 2 0 1 1 1 3 -2 1
8 Bethlehem VT 2 0 0 2 1 3 -2 0