Tlai dar 3-ah MPL club thar intawng dawn ; Chawnpui vs Electric Veng

McDowell's No.1 Soda Mizoram Premier League Season 7-ah club thar pahnih Chawnpui FC leh Electric Veng FC te an awm a, vawiin tlai dar 3:00 hian Lammualah an intawng dawn.

AFC leh Police ngamtu

Tualchhung football-ah hian sulhnu nei ṭha pahnih lakchhuah tur a nih chuan Aizawl FC leh Mizoram Police hi thur chhuah hmasak tur an ni a, Electric Veng hian tun hma leh tun hnu thlenga club ṭhaa chhal theih AFC leh Police te hi an hneh ve ve tawh.

Electric Veng boruak inhlap chho fuh takin MPL7 a tingaihnawm a, vengchhung ṭanrualna leh team thawhhona ṭha tak avangin round 2-na khelh zawhah champion lai Chhinga Veng nen hmahruaitu an ni a. MPL club leh sawm bik telna I Day Football-ah EFC-in semifinal an luh tawh bawk a, tun ṭumah pawh match hnih lek an la khel chungin semifinal an mitthla tawh ang.

A ruh lang chuan...

Electric Veng hian Police leh AFC meuh hneh mah se fak chiam a la hun lo a, he team hian inzirna tur tam tak an la nei a, an puitlin tawk lohna khelmual chhungah a la lang tam hle.

MPL club thar hian goal thum an khung tawh nachungin open play aṭanga goal khung an la harsat! Aizawl FC an hneh ṭuma goal hnih chu Isak Vanlalpeka freekick pet aṭanga chhuak ve ve a ni a, Police nen erawh David Lalchhuanawma'n chakna goal a khung.

Amaherawhchu, Police tlarhnung a phui lo a, Electric Veng hian goal chance ṭhahnem tak an hlah a, goal hmaah an hriam tawk lo a, an goal khung pawh hi Police-in an defender te an tlan chak lo tih an hre reng chunga keeper nen an inkar an tihzauh vang a ni a. David-a tlan chakna leh finishing sawi nep phal chi a ni lo nachungin Police-in chak an duh luat vanga an tlarhnung an ngaihthah vang tihin a sawi theih bawk.

Vawiin tlaia an khingpui tur Chawnpui erawhin Electric Veng hi an nau en ve dawn lo a, Aizawl FC leh Police te aiin an fimkhur dawn. EFC-in fiahna tak tak tihin a sawi theih a, Chawnpui lakah chuan counter attack a rem tawh dawn lo.

Beisei aia ṭha

Chawnpui FC-in MFA Super Cup match hmasa berah Aizawl FC Academy an hneh lo nghal a, I Day Football-ah pathumna ni pha mah se group-a MPL club awm pahnih Chhinga Veng leh Mizoram Police FC te an hneh lo a, an hnuaia awm Jamshedpur FC leh Kanan FC te erawh an hneh ve ve thung.

MPL7-ah Chawnpui hi team nem deuh tura ngaih an ni a, amaherawhchu champion lai Chhinga Veng pawhin MPL club thar hi 1-0 chauhin an hneh. Ramhlun North nen pawh Chawnpui an khel ṭha leh a, keeper tihsual vanga goal khat an chhuah hnuah Vanlalthanga freekick ropui hmangin an sut a, inkhel tawp lamah a chungnung zawk an ni bawk.

Chawnpui hian Hualngohmun tlangval Thanga freekick chu an goal nawr nan ber an hmang a, hmabak nei êng David Lalthansanga te an kawl bawk avangin Electric Veng tan nam nul chi a ni lo ang.