India-in mualpho an pumpelh

Asia Cup-ah India cricket team chuan Thawhlehni zan khan Hong Kong chu run 26 in an hneh hram a, nizan khan Pakistan nen inkhel lehin result kan hre hman lo.

Kumin Asia Cup hi UAE in a thleng a, kum hnih danah inelna neih a ni a, kum 2016 khan Bangladesh-ah India an champion.

Super Four

Inelnaah hian ram paruk Afghanistan, Bangladesh, India, Pakistan, Sri Lanka leh Hong Kong te an tel a, group pahnihah team pathum ve ve a ṭhendarh an ni.

Group A-ah Pakistan leh India ten Hong Kong an hneh ve ve tawh avangin Super 4 a lut tawh a, Group B-ah Bangladesh leh Afghanistan ten Sri Lanka hneh ve ve tawhin Super Four an lut ve bawk.

Super Four hi September 21, Zirtawpni hian khelh ṭan a ni dawn a, vawi khat ṭheuh inkhelh kual hnuah a sang pahnihin September 28-ah final an khel dawn.

Kohli tel lohna

Asia Cup atan hian India rama cricket-a thuneitu sang ber chuan player ṭha tam tak an chawlhtir a, chung zingah chuan captain Virat Kohli pawh a tel.

Kohli hi khawvela cricketer ṭha ber zinga mi a nih bakah hralh tla ber ang hiala sawi theih a nih avangin an tel loh avangin TV lama pe chhuaktu lam pawh an lawm lo.

Beisei pha lo

India tan Shikhar Dhawan chuan run 127 a siam a, Ambati Rayudu chuan half century (60 runs) siam mah se duck out pathum an awm a, chung zingah chuan Mahendra Singh Dhoni pawh a tel. India hian wicket sarih hlohin run 285 an siam.

Hong Kong bat hun a thleng a, India bowler ten an opener pahnih vawm hlum an harsat. Nizakat Khan (92) leh captain Anshuman Rath (73) ten bul an ṭan ṭhat avangin India dinhmun a derthawng a, amaherawhchu a tawp lamah an chet ṭhat zui avangin run 259 bak an tlin lo.

India run 26 siamin an chak hram a, Hong Kong in chak an neih loh avangin semifinal an lut chiang nghal bawk.