FIFA President-in La Liga a sawisel

Football khawvela thu­neitu sang ber FIFA president Gianni Infantino chuan La Liga thuneitute chu USA-a league match khelh an tum avangin a sawisel a, "Home match chu ram pawnah khelh tur a ni lo," a ti.

Spanish league thunei­tuten USA-a La Liga match team tinin, season khatah match khat zel khel turin kum 15 chhung atan inremna an lo siam tawh. Hei hi La Liga club Girona chuan bawhzuiin January 26-a Barcelona an mikhual tur chu USA-a khelh an remti a, La Liga hian Spanish FA lamah dilna an thlen mek.

Mahse, Infantino chuan ram pawna Spanish league khelh a ni tur hi a hrethiam lo. FIFA President chuan, "USA-ah chuan La Liga lo en ngawt ai chuan MLS game hmuhnawm tak en ka thlang zawkin ka ring a ni.

"Football-a thil holam tak, hriatreng tur ni si chu home match chu mahni khelmualah khelh mai tur a ni," a ti a, Spanish league thuneitute na takin a sawisel.

Mahse, La Liga pre­sident Javier Tebas chuan Infantino hi twitter lamah chhangin, "President hi hrilh nawn ka duh chu MLS-a team pathum hi Canada club an ni tih hi a ni a, Canadian club Toronto chu USA-a champion lai an ni. Hetichung hian Canada-ah pawh professional league dang a awm tho a ni," a ti.

MLS-ah hian Candian club pathum Toronto, Montreal leh Vancouver te an inlan vek a, an home match chu an club innghahna khawpui lamah an khel ṭhin tho a ni.