Match li atan Costa an hrem

Juventus forward Douglas Costa chu Sas­suolo winger Federico Di Francesco chil a chhak kum avangin match li chhung khel thei lo tura hrem a ni. Hrem a nihna hi Thawhlehni khan Italian FA chuan an puang.

Kartawp Serie A in­khelah Juventus chuan an mikhual Sassuolo an hneh a, forward thar Cristiano Ronaldo-a'n goal hnih a khung vanga an lawm viau laiin chanchin lawmawm lo an nei.

Costa-a'n chil a chhak khum hi Roma coach Eusebio Di Francesco fapa Di Francesco a ni. Inkhel enkawltu referee-in hmu lo mah se, Video assistant referee (VAR) hmangin a thil tih dik lo tak hi hmuhchhuah a ni.

A player chet danah Massimiliano Allegri a lawm lo a, Juventus coach chuan an hremna hi an khin let loh tur thu a sawi. Italian manager chuan, "Douglas Costa chet dan khan min barakhaih hle, mahse thil tih palh a nih zia a lantir theih ngei ka beisei.

"Match li hrem tur a ni a, kan khing let lo ang. A chet dan phung kha player ten an tih loh tawp tur a ni a, a chungchang hi ka la ngaihtuah ṭha leh ang," tiin a sawi.

Brazilian player Costa hian a thiltih avang hian a player pui leh fans chungah ngaihdam a dil a, kum 24 mi Di Francesco chuan a laka thil thleng chu pawi a tih thu leh theihnghilh a duh thu a sawi ve bawk.