Mizoram tan Kohli century tawk lo

Vijay Hazare Trophy chu nimin khan khelh ṭan a ni a, Mizoramin first class cricket an khelh hmasak berah Arunachal Pradesh chu wicket liin an hneh lo. Mizoram hian run 234 an siam a, Arunachal hian over 47-ah wicket ruk hlohin run 237 an siam thung.

Nadiad, Gujarat-a inkhelah Mizoram chu coin toss-ah vannei zawkin bat hmasak an thlang a, Mizo tlangval pahnih Michael Lalremkima leh K. Vanlalruata ten bul ṭanin an che ṭha lo ve ve.

Vice captain Michael-a run siam loa a chhuah hnuah captain Ruata hian run hni chiah siamin a zui bawk. Mizoram chhanhim turin Taruwar Kohli a rawn che ṭha a, India Under 19 champion pui tawhtu player hian Mizoram tan century siamin run 127 zet a vaw chhuak.

Tualchhung player zingah Kohli thlawp tur an awm lo a, state pawn aṭanga lakluh pahnih dang Akhil Rajput (31) leh Sinan Khader (35) te zarah Mizoramin run 234 an tlin hram.

Mizo zinga run siam hnem ber Saidingliana Sailo-in run 16 a vaw chhuak a, G. Lalbiakvela'n run kua siamin Gaurav Singh leh Lalhruaimawia Ralte te run siam loin an thi.

Tualchhung player run siam zat hi run 27 chauh a ni a, Mizo player tan hmasawnna tur a la tam hle.

Arunachal Pradesh tan opener pahnih Samarth Seth (107) leh Doria (28) bakah Chennai Super Kings player Kshitiz Sharma (61) te chet ṭhat rah an seng a, wicket an hloh har avangin harsatna nei loin hnehna an chang.

Champhai bowler Lalrempuia chuan run 43 chauhin pein wicket thum a la a, Marema bakah hian Lalnuntluanga, Lalhruaimawia Ralte leh Akhil ten wicket khat ṭheuh an la bawk.

Mizoram hi vawiin chawhma dar 9:00 hian vawi khat inlanna tur Meghalaya nen an inhmachhawn ang.