Barca mawina leh chakna Messi hattrick

Lionel Messi-a'n season ṭan hmain, "Champions League nomawi hi kan duh ber chu a ni," tiin a sawi a, Europe-a club te inelna sang ber an ngaih pawimawh zia chetziain a lantir nghal.

Thawhlehni zan khan Barcelona chuan 4-0 in PSV Eindhoven an sawp a, Lionel Messi chuan player ropui a nihzia pholan nan hattrick a siam - a career-a hattrick a siam vawi 48-na a ni. Ousmane Dembele chuan goal khat a thawh ve bawk.

A hming chu Messi

Season thar a ni a, Barcelona chak thu ziah apiangin Lionel Messi goal khung thu ziah a ngai leh ta. Argentine forward hian tun season-ah match ruk khelin goal sarih a khung ta a, Luis Suarez leh Sergi Roberto tan chance ṭha a siamsak bawk.

Messi hattrick-te hi vanneih goal ni loin goal ṭha bik vek a ni! Yard 20 vela hla aṭangin goal hmasa ber hi freekick hmangin a khung a, Rakitic siamsak chu ṭha zetin a khung a, a goal thumna hi Suarez-a siamsak a ni - second half-ah freekick hmangin a khung teuh hle bawk.

Dembele a thiam

Barcelona tan Dembele a chet ṭhat chhunzawm zel a, kum 21 mi forward hian season hmasa tluana a goal khung aia tam a khung der tawh - seaosn hmasa khan hliam vangin match 23 chiah a khel a, goal li a khung.

Tun season-ah erawh Dembele a dam tawh a, match ruk a khelhah goal nga a khung tling ta. Barca-in a man zat atana pound maktaduai 100 chuang insen an huam chhan a pholan chhunzawm zel - khelmuala hun a hman chhung zawngin a khel ṭha.

Barcelona kum?

Kum 2015 hnuah Barcelona-in Champions League nomawi an chawi leh tawh lo a, an hmelma kumhlun Real Madrid-in a zawnin European champion dinhmun an chelh tawh thung!

Barca-in season hmasaah La Liga leh Copa del Rey nomawi an chawi chungin Real che ṭha rengin an mit a ti kham a, an duh ber chu Champions League - PSV laka an khelh dan en chuan champion an phu a, Barca tan tun hi kum ṭha a ni ang em? tih chu zawhna a ni ta.