Inter khelmualah Spurs an vanduai

Tottenham Hotspur-in minute 85-na thleng goal khatin hma hruai mah se an vanduai a, Inter Milan-in hun tawp hnaih lama goal hnih an khung vangin San Siro khelmualah 1-2 in an tlawm.

Spurs tan Christian Eriksen chuan minute 53-naah goal hmahruai a khung a, Inter-in an chhanlet lawk theih loh avangin London club hi an chak dawn niin a lang hman.

Mahse, minute 85-naah hun tam zawk hmuh tur awm lo Mauro Icardi a inlar a, yard 20 vela hla aṭanga volley-in an si phurh a sut a, Uruguayan midfielder Matias Vecino chuan hun pek belhah chakna goal a khung zui.

Spurs-in Inter Milan an hneh loh leh tak avangin match thum chhung chu a zawnin hnehna an chang ta lo - Watford leh Liverpool lakah a zawnin an tlawm tawh.

Tottenham coach Mauricio Pochettino chuan, "Hun tawp hnaih thleng kha chuan game kan thunun em em a, a pawi ber chu game 'thih' tir theihna remchangah kan ti lo a ni," tiin an chak loh chhan a sawi.

Aw... Harry Kane

Tun hnaia Tottenham chet chhiat chhanah Harry Kane puh a ni a, World Cup top scorer hi mi tam takin a fitness ṭha tawk lo niin an sawi a, coach Mauricio Pochettino tan chhan a ngaih phah fo.

Inter nen an intawn hma pawhin Kane chungchang bawkin sawi a hlawh a, amah ang thoa a club khelh meknaa match hnih dana goal khung zel anga chhut Icardi nen khaikhin an ni - Icardi hian khel ṭha bik lo mah se a chet chhiat thup mawi nan goal a khung tlat!

Kane erawh goal khung lo bawkin a hun a hmang a, match thum chhung chu English striker hian goal a khung ta lo. Kum 25 mi striker hian tun season-ah match ruk khelin goal hnih chiah a la khung - Harry Kane nen a inhmeh lo.

Poch a insawifiah

Spurs boss Pochettino-a'n tlarhnungah a player pawimawh pahnih Toby Alderweireld leh Kieran Trippier a khelhtir lo a, bench lamah hun a hman tir - inkhelh zawhah Poch a insawifiah.

Argentine manager chuan, "Player pahnih hian Watford leh Liverpool kha an hmachhawn ve ve a ni," tiin a defender pahnih chu khelh chhiat avanga thlang nawn lo a nih thu a insawi a, mahse tun hnaia an buaina set piece aṭang bawkin Spurs-in goal an chhuah!

Poch chuan player pahnih chungchang zawt luitu journalist-te chhangin, "Football chungchang kan sawi tur a ni a, tunah hi chuan ka sawi duh miah loh min sawi luih tir in tum a ni. Player khel lo pahnih chungchang kan sawi hian zanina khelte kan zah loh telna a ni nghal. Ka starting XI thlan danah in duh chuan min sawisel ula, mahse khelmuala theihtawp chhuah player erawh zah rawh u," tiin a sawi.

Inkhel Result
Barcelona 4 - 0 PSV
Inter Milan 2 - 1 Tottenham Hotspur
Club Brugge 0 - 1 Borussia Dortmund
Monaco 1 - 2 Atlético Madrid
Liverpool 3 - 2 PSG
Red Star Belgrade 0 - 0 Napoli
Galatasaray 3 - 0 Lokomotiv Moscow
Schalke 04 1 - 1 Porto