AFCON: A thiam pali zingah Egypt leh Senegal

Africa Cup of Nations khelh mekah semifinal khel tur a hriat kim ta - Cameroon leh Burkina Faso hnung zuiin Egypt leh Senegal an tling ve leh ta a, Pathianni zan khan an khingpui ve ve an hneh.

Egypt tan a hunah tak Mohamed Salah a rah leh ta a, Morocco lakah goal khat khungin Trezeguet-a goal khung tur a assist bawk a, 2-1 in team ṭha Morocco an pet chhuak - Atlas Lions (Morocco sawina) tana Sofiane Boufal-a goal khungin awmzia a nei phak lo.

Quarterfinal inkhel dangah Senegal chuan 3-1 in Equatorial Guinea mumang ram chu an tihtawpsak a, Senegal tana Famara Diedhiou goal hmahruai khung chu Equatorial Guinea tan Jannick Buyla chuan sut mah se Cheikhou Kouyate leh Ismaila Sarr ten goal khat ve ve an khung ve leh a, 3-1 in Senegal an chak.

Egypt-in Ningani zanah semifinal khel turin inelna thlengtu Cameroon an hmachhawn ang a, Senegal-in Burkina Faso an hmachhawn dawn thung - final luh inchuh boruak a hot dawn.

Team intiat tawk
Egypt leh Morocco te hi thawnthu hlui keu letin intiat tawk lo viau mah se squad-a player an neih dan enin team intiat tawk tak an ni a, tun AFCON-ah chuan Pathianni zan quarterfinal-a an intawng hi en châkawm ber pawl a tling.

Minute rukna lekah Morocco hian penalty hmangin hun ṭha an nei nghal a, Morocco chhuanvawr Achraf Hakimi laka foul Ayman Ashraf chuan penalty a chawi - Boufal chuan hei hi harsatna nei loin goal-ah a chantir a, Egypt an hawihai.

Mahse, inkhelin beisei a phak lo zui - Egypt-in na takin an nawr let tura ngaih a nih laiin tlarhma nei ṭha team hian beisei an phak lo a, Morocco lah goal khung belh tur awm ang khelhin an khel lo zui.

First half-ah team pahnihin chance sawi tur an nei tam lo a, Morocco tana Boufal-a penalty chhuih luh chu sawi tur langsar ber a ni - Liverpool forward Salah meuh pawh a 'Salah' thei lo a, a boruak a dai hle.

Beiseina & beidawnna?
Egypt-in puanthuah tel an la inpeih lo a, Salah-a'n Liverpool lama haw a la chak rih lo - minute 53-naah Premier League forward 'hot' bera chhal ngam hian a team si phurh sutna goal chu awlsam takin a khung a, 1-1 a ni.

AFCON vawi sarih champion tawh Egypt tan second choice keeper Gabaski-a'n Rennes defender Nayef Aguerd-a ball tauh ṭha zet chu hun tawp hnaih lamah ṭha lutukin a lo dang a, mahse, a inhliam zui.

First choice keeper Mohamed el-Shenawy inhliam vanga inlan Gabaski-a'n a team a chhanhim a, a man erawh a tam - lakchhuah a ngai a, third-choice keeper Mohamed Sobhi chu ram tana a match hmasa ber khel tura a tlan luh a ngai!

Goal dang lut loin hun a tawp zui a, semifinal lut tur chingfel turin extra time khelh a ngai - third choice keeper chhawr ngai Egypt dinhmun a ṭha lo a, Morocco-in semifinal an mitthla ṭan.

A tawpah a changtupa
Morocco-in an dinhmun a ṭha sawt tih an hria a, Salah-a'n ngaihdan dang a nei thung - extra time minute 100-naah 'Egyptian King' hming lem an pek hian Trezeguet tan a siamsak a, Aston Villa midfielder hian harsatna nei loin goal-ah a chantir.

Morocco-in hun tawp thlengin si phurh sutna goal an nei thei lo a, 2-1 in Egypt an tlang a, an danglamna chu Salah a ni - kum 29 mi forward hian tun inelnaah goal hnih chiah la khung mah se semifinal an luh theih nana a ṭangkaizia erawh sawi nep chi a ni lo.

Salah hian kum 2017 khan AFCON a hmachhawn ve ṭan a, Africn football-a ram leh ram inelna sang bera a inlan hnua an ramin goal an khung 14 zinga pakuaah a inrawlh a, chu chu 64% a tling hial!

Liverpool forward hian Merseyside club tana hna a thawh ropuizia chu inhrilh nawn a ngai lo a, AFCON-ah an ram hi a champion pui thei a nih ngat chuan Ballon d'Or lam rik a ni leh ngei ang.

Senegal an chak
FIFA ranking-a India ai pawha hniam zawk chu Equatorial Guinea an ni a, 114-na an ni mek - Senegal erawh 20-na an ni a, African ram zingah FIFA ranking-a anni aia sang an awm rih lo.

Team pahnih an inthlau a, beisei ang ngeiin Senegal lamin an nawr na nghal a, Idrissa Gueye chuan freekick hmanga a hun ṭha neih a pet goal thei lo a, Diedhiou hun ṭha neih chu Equatoguinean keeper Jesus Owono chuan a dansak bawk.

Mahse, team chhe zawk Equatorial an ṭang rei thei lo - minute 28-na lekah Turkish club Alanyaspor striker Diedhiou chuan Sadio Mane ball siamsak ṭha tak chu goal-ah a chantir a, Jesus-a'n a dang nawn tawh lo.

Senegal-in goal an khung hma ngaihtuahin goal dang erawh an khung lawk thei lo a, goal dang lut loin chawlhlawk hman a ni a, Equatorial tan beisei a la bo bik lo - quarterfinal hial an lut thei a, an rilru a paukhauh tlat.

Beiseina thamral
Kum 2015-a AFCON semifinal lo lut tawh Equatorial Guinea-in second half-ah huaisen takin an bei let a, penalty an hlawh chhuakah an inngai hman hial - Senegal defender Kalidou Koulibaly chuan box chhungah ball a tawk fuh niin a lang a, referee Victor Gomes-a'n penalty a ham.

Mahse, video assistant referee a inrawlh a, referee hian mual sirah uluk takin a thutlukna a en zui a, Napoli defender Koulibaly tan tawlh sawnna hun hman a awm loah ngaiin a thutlukna a sut a, Senegal an thaw huai.

Mahse, Equatorial Guinea an beidawng duh bik lo - minute 57-naah Spanish third division club Gimnàstic de Tarragona tana khel Buyla chuan Chelsea goalkeeper Edouard Mendy man theih lohin a pet goal a, 1-1 a ni.

Equatorial hlim chhung erawh a rei lo - squad a inchhah hleih hret a, bench aṭanga luhtir Crystal Palace midfielder Kouyate leh Watford forward Sarr te chuan goal khat ve ve Senegal tan an rawn khung leh a, 3-1 in an team an tlangpui.

AFCON - Quarterfinal
January 30, Pathianni Zan
Egypt 2 - 1 Morocco
EGY: Mohamed Salah 53'; Trezeguet 100'
MOR: Sofiane Boufal 6' (P)

Senegal 3 - 1 Equatorial Guinea
SEN: Famara Diedhiou 28'; Cheikhou Kouyate 68'; Ismaila Sarr 79'
EQU: Jannick Buyla 57'

Semifinal
February 2, Nilaini Zan
Burkina Faso 12:30 AM Senegal

February 3, Ningani Zan
Cameroon 12:30 AM Egypt