Mumbai lamah Lianzuala a pêm
India international player Lallianzuala Chhangte chuan Chennaiyin FC aṭangin tun season tawp thleng khel turin Mumbai City FC a pan a, loan-in a chhuak a ni.
Lunglei tlangval Lianzuala chuan, "Thutlukna siam awlsam a ni lo a, hun rei tak ka inngaihtuah a, ka ṭawngṭai a, ka chhugnte leh ka agent-te nen kan sawiho hnuah Mumbai FC zawm hi ka tan ṭha turah ngaiin he thutlukna hi ka siam ta a ni," a ti.
Media lamah chhuan Lianzuala hian May 31, 2022 thleng loan-in Mumbai City hi a zawm tih ni mah se Vanglaini thudawn danin Lianzuala hi a loan hun a hman zawhah pawh Chennaiyin FC lamah hian a kir tawh dawn lo a ni.
MPL Playoff khela Lunglei FC-a hming chher chho Lianzuala hi DSK Shivajian Academy lamah a intuai nhriam chho a, tuna Odisha FC Jerry Mawihmingthanga, kerala Blasters star Lalṭhathanga Khawlhring-te nen an awmho ṭhin a ni. I League-ah season khat a khel hman tihah kum 2017 khan Delhi Dynamos-in ISL khel turin an lalut a, season hnih khelin goal riat a khunga ṭhiante tan goal nga dang a siamsak bawk. 2019-2020 season ṭan dawnah tuna a chhuahsan tak Chennaiyin FC hi a zawm a, Indian player ṭha zingah a tel chho ta a ni.
ISL-a Indian player zinga goal khung hnem lamah pathumna niin goal 20 a khung tawh a, a tluk loh chu Jeje Lalpekhlua leh Sunio Chhetri-te chiah an ni. Lianzuala hi attacking player niin tlar hmaah chuan khawi hmunah pawh a tlan thei a, winger angin khel tam ber mah se team-in a mamawh chuan striker puitu ṭha tak niin a laiah pawh a tlan thei.
India tana vawi 11 khelha goal li khung tawh Lianzuala chuan, "Mumbai FC-a ka khel tur hi ka lawmin ka phur takzet a, hmasawn zel duh mi ka nih angin chona thar ka hmachhawn tur hi ka lawm hle a ni. Theihtawp ka chhuah zel ang a, a hma aia thawkrimin Mumbai City fans tan hlawhtlinna thlen ngei hi ka tum a ni," a ti.
Lianzuala chuan Mumbai City coach Des Buckingham nen an inbiak thu sawiin, "Team-a tel turin min duh tih ka hria a, a game plan-ah ka tel tih ka hriatin ka lawm a, coaching staff thar hnuaia bul ṭan thar ka chak tawh hle," a ti. Buckingham chuan, "Mumbai-ah hian Indian player ṭha lak khawm kan tum a, tunah hian Indian player ṭha ber zinga mi kan la thei dawn a ni," tiin Mizo tlangval a dah sang hle.