Brentford-ah Eriksen a lut

Premier League-ah Christian Eriksen a kir a, a club zawm chu Brentford a ni. Kum 29 mi Eriksen chuan, "Brentford tana contract ka ziak hi ka lawm a, khelmualah min hmuh thuai ka beisei," tiin Brentford twitter kaltlangin a sawi.

Eriksen hi nikum June thlaa Finland nen Euro 2020 group match-a an inkhelh ṭumin lungphu chawl vangin khelmualah nikhaw hre loin a tlu a, hemi hnu hian a la inkhel leh lo.

Danish midfielder Eriksen hian lung lamah harsatna a nei a, defibrillator a vuah. Serie A danah defibrillator vuah chunga inkhelh phal a nih loh avangin Erisken hi Inter Milan tan a inlan thei tawh lo. Nikum December thla khan Eriksen leh a club khelhna Inter Milan chu inhriatthiam tawnnain contract an titawp.

Tun thla tir khan Eriksen chuan FIFA World Cup-ah Denmark tana khelh a tum thu a sawi chhuak a, sawmtu pawh an ṭhahnem. Eriksen hian tun hmaa a lo chen tawhna London-a kir a hreh lo a, London club Brentford a thlang hi mak a hran lo. Bees head coach Thomas Frank hi Danish mi a ni a, kum 2008-2012 chhung khan Denmark Under 17 team a lo enkawl ṭhin avangin Eriksen nen an tawk dun tawh.

Brentford-ah hian Danish mi an tam sa hrim hrim bawk a, assistant head coach Brian Riemer bakah Danish player pasarih an awm a, Denmark tana khel pha Christian Norgaard leh Mathias Jensen te pawh an awm.

England-ah hian sports cardiologist-in player a endik a, khelh phalna a pek chuan defibrillator vuah pawh ni se an khel thei. Manchester United player hlui Daley Blind pawh khan pacemaker a vuah.

Eriksen hian pacemaker chi khat implanted cardioverter-defibrillator (ICD) a vuah a, Premier League-a khelh an phalsak. Brentford hian thla ruk chhung atan Eriksen hi contract an ziahpui a, Premier League a ti ngaihnawm sawt ang.

Danish midfielder hian Spurs tan Premier League match 226 khelin goal 51 a khung. Assist (62), chance siam sak (571), box pawn aṭanga goal khung (23) leh freekick aṭanga pet goal (8) kawngah Premier League-a awm chhung kum 2013 leh 2020 inkarah khan a record a ṭha ber.