South America World Cup Qualifier ; Brazil leh Argentina hnung zui tur inchuh boruak a sang

Kumin tawpah FIFA World Cup khelh a ni tawh dawn a, khawmualpui hrang hrangah a khel tur zawnna pawh a hmawr an bawk hnai. South America aṭangin Brazil leh Argentina te an tling tawh a, a ngaihnawm lai chu tla tawh an awm lo - ram dang pariatin Qatar zin beiseina an la nei vek.

Match nga chu
Zanin/naktuk zing hian match nga khelh tur a awm a, inkhel panga awm tur a pawimawh vek. Zanin dar 1:30 hian Bolivia leh Chile te an inkhel dawn a, pariatna leh pasarihnaa awm inkhel tur a nih avangin a chak zawk tak beisei a sang a, a chak lo zawk tan erawh Qatar zin a har ang.

Naktuk zing dar 4:30-ah Uruguay-in Venezuela an mikhual dawn a, Venezuela hian point thum an hlawh chhuak lo a nih chuan World Cup beiseina a tawp ang. Zing dar 5:00-ah Argentina leh Colombia te an inkhel dawn a, Colombia dinhmun avangin ngaihnven a hlawh ang.

Zing dar 6:00-ah Brazil leh Paraguay an inkhel dawn a, Selecao-in hnehna an chan chuan Paraguay tan beisei tur a awm tawh lo ang. Zing dar 7:30-ah palina Peru-in pathumna Ecuador an mikhual dawn a, inkhel pawimawh bik a ni.

Star player
Uruguay hian World Cup an khel lo a nih chuan football ngainatute tan channa nasa tak a ni thei ang. La Celeste hian tlarhmaah Luis Suarez, Edinson Cavani leh Darwin Núnez te an kawl a, mimal tin hi inelna tihlutu an ni thei ang.

Tlarhnung lamah kum 35 mi Diego Godin leh Jose Maria Gimenez te an inkawp a, mual sirah Barcelona defender Ronald Araújo leh Getafe defender Mathías Olivera te an awm. Midfield-ah Tottenam player thar Rodrigo Bentancur, Real Madrid winger Federico Valverde, Inter Milan midfielder Matías Vecino bakah Manchester United rawlthar Facundo Pellistri te an kawl a, team en châkawm pawl tak an ni.

Chile dinhmun a ṭha lo a, La Roja hi an khel lo a nih chuan Alexis Sánchez, Charles Aránguiz, Gary Medel leh Claudio Bravo te an awm dawn lo tihna a ni. Chutihrualin Alexis te an tlak hniam ve bawk avangin player lar hluai an awm lo.

Colombia-in an match hnuhnung berah Peru an hneh lo a, tla thei dinhmunah an din phah. Radamel Falcao, James Rodríguez, Davinson Sánchez, Juan Cuadrado leh David Ospina te an awmna an ni a, European club-a tawnhriat nei ṭha an nih hlawm avangin World Cup khel turin an itawm hle.