A chung bera ding Rafael Nadal chu

"Final ropui rapthlak a ni" tiin tennis legend Rod Laver-a'n a sawi. Australian Open 2022 final hmuhnawn entute chuan a thusawi hi an ṭawmpui ngei ang. Rafael Nadal-a'n Grand Slam champion hnem ber ni tura Daniil Medvedev a hneh dan chu tennis inkhel ropui sawi apianga sawi tel ṭhin a ni tawh ang.

Darkar nga leh minute 24 an inkhelh hnuah Nadal a chak hram. Grand Slam final bikah set hnih a hloh hnua a thawh chhuah lehna hmasa ber a ni a, an inkhelh hun chhung hi a rei a, a bik takin kum 35 mi Nadal tan a rei zual tura ngaih a ni.

Nadal chuan, "Zan danglam a ni, ka taksa leh rilru lam aṭanga sawr chhuah tur awm zawng zawng chu ka sawr chhuak. A nihna tak sawi chuan ka chau, engkim mai hi a hah vel vek, mahse hetiang taka inbeihna hi a nuam ka tih zawng a ni thung.

"Boruak inthlak leh inlumlet velte kha a nuam ka tih zawng tak a ni, harsa taka nomawi hlawh chhuah chu a tawpah a hlu bik tih pawh a takin a lang," tiin Australian Open nomawi a chawi hnuah a sawi a, tennis match a khelh tawhah chuan a hautak zinga mi a nih thu a sawi bawk.

Beisei phak bak
Season hmasa khan Nadal hi a ke phah a hliam, thla nga chhung chu a inkhel thei lo. Wimbledon, Tokyo Olympic leh US Open aṭangin a inhnukdawk vek. December thla khan Dubai-ah exhibition match khel ve zuai mah se Covid-19 a kai zui.

Spanish star Nadal chuan, "Ka tan chuan a mak a ni. Thla khat leh a chanve vel liam ta kha chuan Australian Open hi ka khel thei dawn em tih a la chiang lo, tunah chuan nomawi ka chawi ta mai si," tiin a beisei phak bakin thil a thleng.

Grand Slam khelh hmain inbuatsaih nan tournament tenau zawk an khel ṭhin. Nadal hi hliam damhlim a nih bakah hripui a kai avangin a inkhel lo rei. Melbourne Park a pan hma khan inbuatsaihna tournament pawh a khel lo hial a ni.

Kum nga liam ta khan Federer chuan Australian Open nomawi chawiin Grand Slam la hnem ber record a siam, kha tih lai khan hliam vanga thla nga a chawlh hnua lo kir hlim a ni - a thawnthu ang deuh chiahin Nadal-a'n a rawn zui niin a lang.

Nghilh loh tur
Tournament khelh hma kar khat la awmah Nadal-a'n Melbourne a thleng tawh, a elpui Novak Djokovic-a'n visa chungchanga buaina a tawh lai khan hahdam takin a lo awm thei tawh, a tir aṭangin a kawng a fuh chho hle.

Nadal chuan, "Australia ram ka thlen tirah aṭangin thlawpna ka dawng ṭha em em a, chawlh kar thum chhunga min lo lawmna leh dawnsawn dan hi ka beisei phak bak a ni. Tennis ka khelh chhunga hun tawn ropui zinga mi a nih avangin ka hre reng tawh ang," a ti.

Chawlh a la tum loh thu sawi zuiin Nadal chuan, "Theihtawp ka chhuah zel dawn, ṭha taka inenkawl ka duh, nakkumah kan inhmu leh vek dawn nia," tiin amah ṭantute tana thu lawmawm a sawi, hliamin a ti buai a nih loh chuan a hmel kan la hmu leh ngei dawn.

Australian Open bikah Nadal hian final vawi ruk a khel tawh, vawi li ngawt a chak lo zawkah a ṭang. Mahse, beidawng duh loa a beih zel miau avangin a vawi hnih nan a champion a, a sulhnu hi sawi nep theih a ni tawh ngai dawn lo.

Ropui ber Rafel
A tehtu a zir a ni thei ang, tehna hmanrua leh a teh dan a zir pawh a ni thei ang. Tun dinhmunah chuan kil hrang hrang aṭanga tehin Rafael Nadal hi tennis player ropui bera chhal ngam a ni a, a chunga leng tumah reng an awm lo.

Mahse, Nadal hian elpui a nei - Roger Federer leh Novak Djokovic ten tennis an la chawlhsan bik lo. Player pathum hian inelna hmuhnawm leh ropui min la chhawp chhuahsak zel dawn niin a lang a, an pathum hian anmahni ṭantute ngaih danah chuan a ropui ber ṭheuh an ni ang.

Record thar a siam hnuah Nadal chuan, "Khawvela a ṭha ber tih leh a ṭha berte zinga mi tih hi ka ngaihtuah ber a ni lem lo. Buaina leh harsatna awm loa tennis khelh tawp mai hi ka duhthusam zawk chu a ni," tiin a sawi.

Nadal a chungnung
Mi tam tak chuan Nadal chu clay chungah a ṭha fal, hei hian midang chungah a len tir mai a ni. Hard court leh grass lamah a ṭha tawk lo, tiin an sawisel ṭhin. King of Clay a nih miau avangin an sawiselna pawh hi a mak hran lo.

Nadal hian Grand Slam 21 a chawi zinga 13 chu Roland Garros aṭangin a ni a, a elpui Roger leh Djokovic ten hetiang tak hian hmun khata nomawi chawi hnem an nei ve lo; anni pahnih hian Paris khawpuiah ṭum khat ve ve chiah hlawhtlinna an chang thung.

Hard leh grass court-ah Nadal a ṭha tawk lo tih hi amah sawisel nan a ṭha tawk em tih erawh ngaihtuah tham a ni. Nadal-a'n hard court-ah Grand Slam title paruk ngawt a chawi tawh - Australian Open pahnih leh US Open pali a nei tawh a ni.

Wimbledon title pawh vawi hnih a vaw chhuak tawh. Hlawhchham nia an sawina hmuna a title lak hi player tam zawk tan chuan hlawhtlinna lian bik a ni phak daih, nomawi a neih dan chhut chuan a ṭhat lohna hmunah pawh mi dangte aiin a la ṭha zawk tho!

A ṭha pahnih chungah
Novak Djokovic nen an intawn tawhna zawng zawngah Nadal hi 28-30 in a hniam zawk. Mahse, inelna lian Grand Slam bikah chuan Nadal hi 10-7 in a chungnung zawk, an inkar hi danglam thei la ni mah se tunah chuan Rafa-a record hi a duhawm zawk.

Mi tam takin player ropui ber leh thiam bera an ngaih chu Roger Federer a ni. Swiss star vanglai hmu phak tam chuan ani aia thiam sawi tur hi an awm lo reng a ni, mahse a vanglai tak pawh khan Nadal a hneh hleithei tlat lo.

Tennis inelna hrang hrangah Nadal-a'n Federer lakah 24-16 in hma a hruai. Grand Slam huangah pawh 10-4 ngawtin a chungnung zawk, an pahnih intawn tawhna hrang hrang en chuan record nei ṭha zawk chu an awm a ni.

Nadal hian ṭhat tawk lohna leh hniam deuh bikna chu a nei ngai mai. Chutih rualin an ngaihhlut ber Grand Slam title kawl hnem ber a ni rih a, tun dinhmun bik atan chuan a chunga leng an awm lo - French Open lak belh leh ngei a tum ang.

Inkhelh chhung zawng khan keimah keh keimah ka infuih reng, he hmunah hian hun remchang ṭha ka neih chu ka lo hloh fo tawh. Tun ṭumah chuan hlawhtling tura bei luih turin ka inseh ruh nasa, a tawp thlenga bei tur leh chakna kawng sual chhuak turin ka in fuih nasa," - Rafael Nadal

Roger Federer-a'n a elpui Rafael Nadal tan ṭawngkam ṭha a ui ngai lo, a vanglai tak pawha hneh a harsat ṭhin Rafa ṭhat tawk zia a hrechiang, inel tak ni mah se ṭhian inkawm ngeih an nih avangin lawmpuina thu pawh a ziak thui angreng hle. "Inkhel ropui tak a ni, ka ṭhianpa leh elpui ni bawk Rafael Nadal chu Grand Slam vawi 21 champion a nih theih avangin ka lawmpui. Thla tam vak lo kal ta kha chuan hliam enkawl lai niin kan titi dun kha a ni sia, a mak a ni. Player ropui bik hi dah hniam theih a ni lo.

"I thawhrimna, inpekna leh huaisen taka i beih ṭhinna hi ka tana chona min petu a ni a, kei chauh ni loin mi tam tak tak a ni ngei ang. Nang nena kum 18 chhung tennis inelna ropui chhawp chhuak theitu ka ni hi vannei ka inti in ka lawm. "Nomawi tam zawk i la chawi belh ngei ang tih ka ring, mahse tuna tan chuan Australian Open title kha lawm phawt mai rawh," - Roger Federer

Australian Open champion lai ni mah se Novak Djokovic a inlan thei lo. Serbian star hian a lal ram Melbourne Park-ah ngei mai a elpuiin hnehna hlado chham khum mah se, puitling takin lawmpuina thu a chhak chhuak nghal. "Grand Slam title 21-na i lak avangin Rafael Nadal ka lawmpui a che, huaisen taka i beih let ṭhinna hian min hnehin ṭhin ngei mai. Daniil Medvedev khan kan beisei ang ngeiin a theihtawp tak meuh a chhuah bawk," - Novak Djokovic

Australian tennis legend, stadium hming chawi chhan Rod Laver pawhin final ropui a tih thu twitter lamah a ziak. Final kha Rod Laver Arena chhungah khelh a ni a, an ram chhunga tennis stadium ṭha leh changkang ber a ni. "Rafael Nadal leh Daniil Medvedev ten final ropui rapthlak min chhawp chhuahsak. Australian Open nomawi pahnih, major title 21 ni bawk hlawh chhuak tura i beihna kha a ropui takzet a ni Rafa. Infiamna i hmangaih leh ngainat tana theihtawp i chhuah na hi hmuh a nuam, ka lawmpui che." - Rod Laver