Beiseiawm Medvedev

Player ṭha bik pathumten elphaktu an nei ngai meuh lo, tunah erawh Daniil Medvedev a rawn lan tak avangin thlamuang taka awm theih a ni dawn lo. Russian tlangval hi kum 25 mi a ni a, world number 1 Djokovic aiin kum kua zetin a naupang zawk.

US Open 2021 final-ah Medvedev hian Novak a hneh thei, Australian Open bikah phei chuan a kum zawnin final a lut. Nomawi chawi ta chiah lo mah se player ṭha bik a nihna a lantir, mi danglam Nadal kher hmachhawn lo se chuan tun ṭumah pawh khan champion phu khawpin a khel.

6ft 6in a sang Medvedev hian service a nei ṭha tawk, forehand chu midangte ang bawka ṭha a ni a, a danglamna pakhat chu backhand a nei ṭha tel hi a ni, a ball vuak a dikin a na tel tlat bawk. Nadal lakah pawh a hmanraw hlauhawm ber pakhat a ni.

Mahse, famkim lohna a nei ve tho. A taksa a lian tawk lo, a cherin tharum a ngah tawk lo. A san avangin a che rang tawk lo a, Nadal-a'n forehand na tak hmanga a beih hnua net play a neih zauhin a tlan thleng hman ṭhin lo, tharum leh chet ran zual a mamawh.