AFC World Cup Qualifier ; Vawiin tlaiah Japan leh Saudi Arabia an intawng dawn
Kum tawpah World Cup khelh a ni tawh dawn a, Qatar-a zin tur zawngin khawmualpui hrang hrangten qualifier hmawr an bawk hnai hlawm a, Asian football pawh a 'hot' chho ṭan leh tak tak ta!
Asia-in World Cup-a hmun li a neih aṭanga hmun ruak pakhat chu Iran-in an hnawh khat tawh a, hmun ruak dang pathum inchuh boruak a la na hle.
Vawiin tlai dar 3:44-a Japan leh Saudi Arabia inkhel tur hi en châkawm a tling a, group B aṭangin anni pahnih hi tling thei dinhmunah ding mek mah se Australia an la awm avangin an dinhmun a him lo.
Australia hian zanin dar 9:30-ah Oman an hmachhawn dawn bawk a, point khat chiaha pahnihna Japan an phak loh mek avangin Socceroos (Australia sawina) tan zanin inkhel hi dinhmun siamṭhatna hun remchang a ni.
Japan an ṭha?
Mizote ṭan hlawh ni lem lo Saudi Arabia hian group B-ah point 17 hmuin hma an hruai mek a, match sarih an khelh tawhah tlawm an la nei lo - Japan nen an inkarah point li lai a awm.
October thlaa Saudi laka 1-0 a lo tlawm tawh Samurai Blue (Japan sawina) hian vawiin tlaiah Saudi hi an hneh thei a nih chuan an inkarah point khat chiah a awm ang a, match hnih khelh tur la awmah boruak a 'hot' lehzual dawn tihna a ni - an intawnna hmasa hi Saudi lamah a ni a, tunah erawh Japan-ah an inkhel dawn thung.
Lehkhaa en mai chuan match li chhung a zawna chak tawh Japan hi team ṭha an ni - Vissel Kobe striker Yuya Osako hian tun qualifier-ah ringawt goal 10 a khung tawh a, Liverpool forward Takumi Minamino-a'n goal kua a khung tawh bawk. Tun season-a Celtic tana goal 16 khung tawh Kyogo Furuhashi a inhliam mah mah!
Tlarhnungah tawnhriat nei ṭha Yuto Nagatomo hoin Schalke 04 defender Ko Itakura leh Nimes keeper Naomichi Ueda te ho an awm a, midfield-ah Real Mallorca player Takefusa Kubo leh Fortuna Dusselfdorf midfielder Ao Tanaka te pawh hi rintlak tura ngaih an ni - Saudi lakah an tlawm nawn a nih chuan dem an hlawh ang.
Australia beiseina
Group B aṭanga World Cup khel thei tur automatic spot-ah Saudi leh Japan an awm a, tun ang hian qualifier hi tawp ta se Australia tan chuan fourth round aṭanga inter-confederation playoff khelh chu kalkawng tur a ni dawn.
Socceroos tan chutianga qualifier khar chu thil tlawm thlak a ni ang tih a chiang a, zaninah Oman hneh ngei ngei an mamawh - Japan tlawm se, Oman hneh bawk se, Australia hian Japan tlansanin pahnihna an ni daih thei dawn.
Tim Cahill te hun lai angin Australia hian player langsar nei tam lo mah se Celtic midfielder Tom Rogic, Shanghai Port midfielder Aaron Mooy leh Brescia defender Fran Karacic te ho pawh chakpui tham an ni a, qualifier-a goal ruk khung tawh Jamie Maclaren hi lam hmaih a thiang lo bawk.
Group A-ah Iran an tling tawh a, pahnihna South Korea hian zanin dar 7:30-ah Syria an hneh chuan World Cup khel turin an tling chiang bawk ang - team pahnih player neih dan khaikhinin an chak ngei pawh a rinawm.
AFC World Cup Qualifier Kalphung
First round: 2022 FIFA World Cup qualification (AFC) hi first round aṭanga khelh ṭan a ni a, hetah hian team 12, FIFA ranking-a 35-46 na te home & away hmangin an inkhel a, a chak paruk chu second round an lut.
Second round: Rank 1-34 leh first round aṭanga inpetkai team 40 te an inel a, team panga zel awmin group pariatah ṭhen hran an ni a, group tina pakhatna leh pahnihna ti ṭha pali chu third round-ah an tlang.
World Cup thlengtu Qatar chu tling sa an ni a, an group-ah hmahruaitu an nih bawk si avangin an hmun ruak la awm hi pahnihna ti ṭha zinga panganain an luahzui. Second round-ah hian India chu group E-ah Qatar, Oman, Afghanistan leh Bangladesh te nen an awmho a, pathumna niin an tlang zo ve ta lo.
Third round: Third round-ah hian team 12 an inel a, group pahnihah team paruk ve ve awmin ṭhen hran an ni - group pahniha a sang pahnih hi Qatar-a World Cup khel turin an tling chiang ang - he round hi tuna an khelh mek round hi a ni.
Fourth round: Third round group pahniha pathumna team ve ve chu single match khelin an inhmachhawn leh ang a, he inkhela chak zawk hian inter-confederation playoff hmangin World Cup khelh an la beisei ve leh thei a ni.
Hmun ruak: Asia hian 100% a chiang chuan World Cup-ah hmun ruak pali a nei a, inter-confederation playoff hmanga hmun khat an la chan theih bawk avangin an hmun chan zat hi 4.5 tiin sawi a ni ṭhin.