Windies-in England an hneh

West Indies chuan Pathianni khan an mikhual England chu T20 series tawpna ber mach-ah 17 runs-in an hneh a, Windies hian 3-2 in hnehna an chang.

Kensington Oval, Bridgetown-ah West Indies-in bat hmasak an thlang a, batter an che ṭha rual. Kieron Pollard-a'n thi loin 41 runs a siam a, Rovman Powell (35*), Brandon King (34) leh Kyle Mayers (31) ten 30 runs siam tling vekin 179/4 runs an siam.

England tan opener-te an che ṭha tawk lo a, James Vince (55) leh Sam Billings (41) te chet ṭhatin a chhan zo lo. Windies tan Jason Holder chuan 27 runs chauh pein wicket nga a la a, player of the match chawimawina a dawn bakah player of the series-ah thlan a ni bawk.

Windies hian India an rawn tlawh zui dawn a, ODI leh T20 match thum ve ve an khel dawn. ODI match hmasa ber hi February 6, Pathianni aṭanga khelh ṭan tur a ni.