Rooney kaihhruai Derby an comeback

Derby County chuan Pathianni zan khan Pride Park-ah Birmingham City an mikhual a, 2-0 a an hnufual hnuah hun tawp dawna goal hnih an khung hmangin 2-2 in an inhnehtawk.

Lee Bowyer-a kaihhruai Birmingham-in Lyle Taylor (7') leh club top scorer Scott Hogan (56') hmangin goal an khung hmasa a, Rams-in minute 87-naah Arsenal aṭanga inzir chhuak kum 19 mi Luke Plange hmangin siphurh an sut ṭhen.

Injury time minute ruknaah substitute Krystian Bielik-a'n siphurh a sut zo a, Derby-in point hlu tak an hlawh chhuak. Wayne Rooney hote hian point 36 hmu tawh mah se club inrel bawlna fel loh avangin point 22 paihsak an ni a, point 14 chauh an la hmuh avangin relegation zone-ah an la awm.

Inkhelh banah Rooney chuan, "Player-te rilru put hmang ka thlak a, club tan bakah ka tan an khel a ni. Kan thawhrim rah kan seng. Chutihrualin kan khel ṭha tawk lo a, kan theihna tak tak anga kan khelhchhuah theih a ṭul. Birmingham laka point kan hmu hi kan vannei hle," tiin a sawi.

Derby ṭantu mi sang chuang chuan Birmingham nen an inkhelh hma hian kawng an zawh a, an hla pui chu, "Derby County kan ni a, a tawp thlengin kan bei ang," tih a ni.

Rams hian hun harsa an tawh mek avangin manager Rooney pawhin a bul ṭanna leh a club hmangaih Everton sawmna a hnawl phah a, Derby hi hun harsaa an awm laiin chhuahsan a duh lo.