Bengaluru tan top four beiseina a nung

Season bul ṭan ṭha lo Bengaluru-in semifinal khelh an beiseina an chhi nung ve zel a, Pathianni zan khan match 10 chhung tlawm nei loa kaltluang tawh Kerala Blasters chu 1-0 in an hneh.

Bengaluru tan Naorem Roshan Singh chuan minute 56-naah inkhela goal awmchhun hi freekick hmangin a khung a, Manipur tlangval goal khung hi goal mawi bik a ni.

Kum 22 mi Roshan hian tun season ISL-ah match 12 khel tawhin goal khat a khungna chiah a ni a, mahse, assist erawh vawi nga a nei tawh thung - left back a ni tih hriat tel a ṭha.

Kerala Blasters tan Harmanjot Khabra leh Adrian Luna ten si phurh sutna remchang nei mah se an chhawr thei lo a, Bengaluru vanneih zan ni se Sunil Chhetri, Danish Farooq, Prince Ibara leh Cleiton Silva te chu goal khung thei dinhmunah an ding bawk.

Bengaluru-in hnehna an chan avangin table-ah palina dinhmun an luah ta a, pangana ATK Mohun Bagan aiin match thumin an khel tam thung - an san zawkna hi point khat chauh a ni bawk a, semifinal khel phak turin hnathawh tur an la ngah hle.

Kerala Blasters tlawm mah se table-ah pathumna an ni a, Bengaluru nen point 20 ve ve an nei - match hnihin an khel tlem zawk thung.

Bengaluru lakah hian Blasters tan K. Lalṭhathanga chuan ṭum dang ang bawkin inkhel bul a ṭan a, Bethlehem Vengthlang tlangval hi minute 81-naah lakchhuah a ni.