Ronaldo an hnawt chhuak!

Cristiano Ronaldo-a'n Juventus tan Champions League match hmasa ber a khelh zanah hnawh chhuah a ni a, penalty vawi thum awmna inkhelah Italian champion hian Spanish club Valencia chu 2-0 in an hneh.

Thawhlehni zan Group H inkhel dangah Manchester United chuan Young Boys 3-0 in an hneh ve bawk. Portuguese forward Ronaldo hi match thum chhung hrem a nih chuan, group match khel tura Old Trafford-a an lenluh hunah a inlan ve thei lo ang.

Ronaldo Out
Champions League goal khung hnem ber Ronaldo (120 goals) an neih avangin Juventus hi champion tura rinkai an nihna belhchhah in a awm a, group match hmasa ber aṭangin ngaihventu an pung thar hle bawk.

Serie A match thum goal a khung loh hnuah Ronaldo-a'n a match hnuhnung berah goal hnih a khung leh tawh a, tun hma lama a tlangnel tawhna Spain-ah pawh khung chhunzawm ngei tura ngaih a ni - Juve fans lamin beiseina mit in an forward thar chetla lai an thlir.

Mahse, minute 29-na a ni a, beisei loh thil a thleng ta. Valencia defender Jeison Murillo chu tlu dera ngaiin, ball awm loh hnuah Ronaldo hian a luah a va tuai zauh (?) Referee Felix Brych-a'n Ronaldo hian Murillo sam a kek niin a ngai a, assistant nen an inbiak rawn hnuah 'red card' a phawrh.

UCL match 154 a khelh tawh china a vawi khat nan Ronaldo hnawh chhuah a ni a, a chunga thil thleng hrethiam loin khelmual chhungah a hrilhhai zia nasa takin a lantir, a tawpah mittui nen khelmual a chhuahsan.

Penalty pathum
Ronaldo hnawh chuah a nih hnuah Valencia lamin na takin an nawr ngam a, Chelsea aṭanga loan hmanga an hawh Michy Batshuayi chuan Wojciech Szczesny tan hna hautak zet a siamsak - mahse Juve an him hlauh.

Chawlhlawk hma chiahin Valencia midfielder Daniel Parejo-a'n Joao Cancelo lakah a foul vangin penalty a chawi, a pet tura rawn ding chhuak Miralem Pjanic tan harsatna a awm lo. Bosnian midfielder hian minute 51-naah Leonardo Bonucci hlawhchhuah penalty a khung leh bawk; goalkeeper Neto tan tih theih a awm lo.

Hun pek belhah mualneitu Valencia tan Gabriel-a'n penalty a hlawh chuak ve a, midfielder Daniel Parejo-a pet chu Arsenal keeper hlui Szczesny-a'n a lo dan sak, team pahnih ten goal an khung hmain Parejo hian a hun ṭha neih a lo hlah tawh bawk.

Pound makatduai 99.2 senga an lakluh Ronaldo chân mah se Juve tan khualmuala point thum hmuh hi chanchin ṭha a ni, Massimo Allegri nauten 1996 hnua a vawi khat nan UCL nomawi chawi an tumna kawngah bul an ṭan fuh thawkhatah a ngaih theih.

United chakna Pogba
Nipui bazar laiin Paul Pogba hming a langsar a, France international hi Manchester United chhuahsan tur angin a thawm a ring hman hle. Mahse, United chhuahsan loin season a hmang, tunah chuan Jose Mourinho naute chakna thahrui pawimawh a ni chho mek.

Juventus midfielder hlui Pogba hian Brazil international Fred nen ball an in pek kual hnuah a ke vei lamin goal hmahruai a khung. Hemi hnu hian hliam dam hlim Luke Shaw cross chuan defender Kevin Mbabu kut a per a, referee-in penalty pein Pogba bawkin an goal hnihna khung nan a hmang.

United player zinga hlawh hnem ber Alexis Sanchez aia luhtir Anthony Martial chu mual sir lamah a hmuhnawm, ram tana a khelh pui Pogba hnen aṭanga a ball hmuh chu 'cool' zetin Young Boys goalkeeper David von Ballmoos dan theih lohin a pet lut.

Goal thum an neih hnuah Romelu Lukaku goal khung chu offside vangin pawm sak a ni lo a, defender thar Diogo Dalot chu a vawi khat nan United tan a inlan a, minute 90 chhung khelin manager Mourinho mit a tlung hle.

Mourinho a lungawi
Manchester United manager Jose Mourinho chuan a naute khelh dan chu duhthusam vek ni lo mah se a lungawi thu a sawi. Mourinho chuan, "Goal khat kan khung hnuah inkhel kan thunun thei chuah, a hma lam kha chuan kan buai ve hle. Chak nemnghehna goal kan khung thei bawk.

"Kan inkhelah hmasawnna tur a la awm a, chutih rualin lungawina tur lai a tam zawk. A nihna takah chuan Young Boys lakah hian team dang pawhin point ruk an hmu thei tura ngaih a ni, tunah chuan Valencia leh Juventus nena inelna hautak hmachhawn turin kan inpeih a ngai," tiin a sawi.

Swiss club Young Boys hian an khelmualah phul lem (artificial pitch) an hmang a, khelmual chungchang zawhna chhangin Mourinho chuan, "Ka naute zingah inhliam hlau an awm tih chu a chiang a, training kan neih lai pawhin a hriat theih," a ti a, hliam leh buaina lian tawk loa khelmual an chhuahsan theih chu a lawm thu a sawi bawk.