Zaninah AFC leh Police

Mc Dowell's No. 1 Soda Mizoram Premier League Season 7-ah vawi hnih champion tawh Aizawl FC-in chak hmel an la hmu lo a, zanin dar 7:00 hian Mizoram Police nen an inhmachhawn dawn.

Police-in an match hnuhnung berah Electric Veng FC an hneh loh avangin insiamṭhat an mamawh a, amaherawhchu an khingpui tur Aizawl FC hi MPL7-a budget nei sang ber zinga mi I League club an ni.

Aizawl FC lam...

Aizawl FC-in I League hnuhnung bera best coach Gift Raikhan an lalut a, MFA Super Cup leh I Day Football-ah eng ruai an ang lo a, MPL-ah beisei an pha lo lehzual.

AFC hian an match hmasa bera Electric Veng an hneh loh hnuin Chanmari nen an inhnethawk. Coach Gift Raikhan chuan, "Result ṭha kan mamawh a, chak a ngai tawh. Mizoram Police-in player ṭha an ngah a, amaherawhchu chhuanlam siam a thiang lo," tiin a sawi.

Aizawl FC coach hlui chuan sawi chhunzawmin, "Police hian long ball an vawrh nasa a, kan talbuai loh a ngai. Tunah chuan Mapuia a dam tawh a, Govin pawh chhawr theih a ni," tiin Vanglaini a hrilh.

I League club hian Chanmari FC an hmachhawn ṭumin Lalkhawpuimawia an chhawr thei lo a, inhliam vanga lakchhuah Govin Singh an hman leh theih bawk chuan an squad a chhah sawt dawn. Hriat tel atana ṭha chu rawlthar duhawm Isak Vanlalruatfela'n MPL a khelh hmasak berah goal khat a siam sakin goal a khung sak bawk a, man of the match a ni nghal.

Police lam...

Mizoram Police ṭhatna ber tiha an sawi chu tlarhma lam a ni a; Lalfakzuala, F. Lalrinpuia leh Lalbiakhlua te chu MPL top scorer ni vek tawh an ni a, sulhnu an nei ṭha.

Amaherawhchu, Police hi an ṭhatna ber tlarhmaah pawh an goal nawr a na tawk lo a, an tlarhnung erawh a ṭha tawk lo tih Electric Veng an khelh ṭumin a lang chiang.

Mizoram Police coach Lalbiaksanga Colney chuan, "Kan khelh dan hmang kan siamrem dawn a, point thum hmuh hi a pawimawh a, chutihrualin fimkhur taka kan khelh erawh a ṭul a ni," tiin tlarhnung thuam chak a ṭul thu a sawi.