India-in hmelma Pakistan an sawp

Asia Cup-ah India chuan Nilaini zan khan group A hmahruaitu ni turin Pakistan chu wicket riatin an hneh a, an target 163 an um phak hian over 21 an la chuang bawk.

Group khatah hian team pathum zel an awm a, Super Four-ah pahnih zel tling tur an nih avangin Pakistan pawhin group stage an paltlang a, chak nei lo Hong Kong an tla thung. Group B aṭangin Afghanistan leh Bangladesh ten stage sang zawk hi an tling ang a, September 21 hian Super Four hi khelh ṭan a ni ang.

India an che ṭha

Virat Kohli tel lohna India team chu Hong Kong an hneh ṭawk avangin sawisel hlawh mah se an hmelma Pakistan lakah an harh chhuak.

Ṭhumvawra chak Pakistan-in bat hmasak an thlang a, opener Imam ul-Haq-a'n run hnih chiah a siam bakah Fakhar Zaman a duck out bawk avangin an talbuai. Babar Azam (47 runs) leh Shoaib Malik (43 runs) ten Pakistan mualpho lutuk tur rawn chhanhim mah se run 162 an siamin an thi vek.

India bat hun a thleng a, captain Rohit Sharma-a'n half century (52) siamin a kawppui Shikhar Dhawan-a'n run 46 a siam ve bawk. Ambati Rayudu leh Dinesh Karthik ten thi loin run 31 ve ve siamin run 164 an siam a, over 21-ah target an umpha der.

Super Four Fixtures
(Inkhel hun : 5:30 PM)
September 21, Zirtawpni
Bangladesh Vs India
Afghanistan Vs Pakistan
September 23, Pathianni
India Vs Pakistan
Afghanistan Vs Bangladesh
September 25, Thawhlehni
Afghanistan Vs India
September 26, Nilaini
Bangladesh Vs Pakistan
Final - September 28, Zirtawpni