Sindhu leh Srikanth an chak

Badminton inelna ngaihhlut te zinga mi China Open khelh mekah India tana medal vaw chhuak thei tura ngaih ten hmalam an pan zel. Nimin khan PV Sindhu chuan quarterfinal a in vaw kai a, ani hma hian Kidambi Srikanth pawhin last 16 a lut tawh bawk.

Rio Olympic silver medalist Sindhu hian Thailand nula Busanan Ongbamrungphan chu 21-23, 21-13, 21-18 in a hneh, game hmasa ber hloh mah se a hnuhnung pahnihah erawh Sindhu a chungnung hle.

Mipa singles lamah seeded pasarihna Srikanth chuan Denmark shuttler Rasmus Gemke 21-9, 21-19 in a hneh a, Indian shuttler hian quarterfinal lut tur chuan Thailand tlangval Suppanyu Avihingsanon a paltlang leh a ngai ang.

Inkhel dangah men’s doubles pair Satwik leh Chirag Shetty te chu 19-21, 20-22 in Goh V. Shem leh Tan Wee Kiong ta ṭangdun lakah an chak lo, Commonwealth Games silver medal latute an tlak ni hian, CWG bronze medallist Ponnappa leh N. Sikki Reddy te pawh Kim So Yeong leh Kong Hee Yong te lakah 10-21, 18-21 in an tlawm ve bawk.