US Open champion Osaka a chak

Grand Slam hnuhnung ber US Open nomawi a chawi hnuah Naomi Osaka chuan a match hmasa ber a khel a, Japanese nula hian Dominika Cibulkova hnehin Pan Pacific Open last 16 a inhlangkai.

Tokyo khawpuia inkhelah kum 20 mi Osaka hian 6-2, 6-1 in hnehna a chang a, chak tur hian minute 59 bak a mamawh lo. A match lehpekah chuan Barbara Strycova leh Anett Kontaveit te inkhela chak zawk nen an inhmachhawn leh ang.

Osaka hian September thla tir khan Serena Williams hnehin US Open champion a ni a, inkhel sawi hlawh takah hnehna chang mah se Serena boruak mawi lo a langsar zawk a, tunah erawh atan lawmna tur dang a inher chhuak ve leh ta.

Seeded pathumna Osaka chuan, "Boruak rit ka in pe duh miah lo a, ka khingpui ka player ṭha tak ni mah se inkhel nuam leh hlimawm tak a ni," a ti. Osaka hian 2016 khan Pan Pacific Open nomawi hi a lo chawi tawh.