Champion lai Real tan harsatna a awm lo

Champions League nomawi kawltu Real Madrid tan an match hmasa bera hnehna chang turin harsatna a awm lo a, season hmasa semifinalist AS Roma chu 3-0 in an hneh.

Real Madrid tan Isco, Gareth Bale leh Mariano Diaz ten goal khat ṭheuh an khung a, Roma lamin a chhanletna tur an neih ve loh avangin nuamsain Real an chak.

Group G inkhel dangah CSKA Moscow chuan Viktoria Plzen lakah si hnih phur hmasa zet mah se khualmualah an comeback a, 2-2 in Czech club nen an inhnehtawk.

Match hmasa berah Roma tlawm nghal mah se an la hmachhawn leh tur hi CSKA leh Viktoria an nih avangin Italian club tan last 16 lut turin harsatna a awm lo tura ngaih a ni.

Real ṭha zawk?

Real-in Cristiano Ronaldo an chan a, Juventus forward ni ta hian Santiago Bernabeu-ah kum kua hun a hman chhungin Champions League-a an goal khung zahve zet chu a assist emaw a pet luh a ni zel!

Spanish club tana Ronaldo pawimawh zia hai ni lo mah se Gareth Bale chuan, "Mimal hmingṭhatna buaipui loin team angin kan khel tawh a, a hahdamthlak zawk a ni," tiin Ronaldo a kap zauh a, Champions League-a an match hmasa berah chuan Bale thusawi a dik rih.

Team ang takin Real an khel chhuak a, Bale leh Isco ten season dang zawnga an neih loh 'zalenna' an nei a, duh ang thalin an tal thei. Goal erawh an beisei angin an khung lawk lo a, an goal hmasa ber an khung hmain shot vawi 17 an nei hman!

Minute 45-naah Isco chuan goal hmahruai a khung ta nge nge a, freekick aṭangin mawi zetin a pet lut. Isco tan Champions League-a direct free kick a pet hmasak ber a ni a, Ronaldo awm lai ni se chu freekick hi Isco chan phakah dah a ni lo.

Hei le Real

Real tan Bale-a'n minute 58-naah an goal hnihna a khung chhunzawm a, Wales forward tan tun season-a match sarih a khelha goal nga a khungna chiah a ni ta - goal a khung hma hian woodwork a tih per bawk a, Bale a hmuhnawm hle.

Isco-a'n chance duhawm dang nei ve leh mah se Roma goalkeeper Robin Olsen chuan ṭha zetin a dan sak a, Swedish keeper hian Toni Kroos leh Luka Modric goal khung ngei tur nia lang chu ṭha zetin a dang bawk.

Olsen hian substitute Marco Asensio goal khung ngei tur nia lang chu a dang bawk a, Roma-in an goalkeeper chhuanvawr Alisson thlaktu tur an lak fuh zia a lang nawn zel.

Roma tan season hmasaa semifinal luh nana an player ṭangkai Edin Dzeko chuan goal khungna remchang a nei a, mahse Thibaut Courtois aia thlan Keylor Navas chuan thlan zawk a nih chhan pholan nana hmangin ṭha takin a dang a, Cengiz Under pet goal tur a dan sak pawh a ṭha takzet.

Number 7 thar!

Real-in number 7 thar an nei a, a hming chu Mariano Diaz a ni. Kum 25 mi striker hian Real tana a match hmasa berah goal a khung nghal a, hun pek belhah Roma laka an goal thumna a khung.

Dominican Republic tan friendly match a inlan zet hnua Spain tana inlan beisei avanga Dominican tana inkhelh chawlhsantu striker hian Raul leh Ronaldo hak ṭhin number a hak avangin sawiseltu an awm.

Minute 73-naa Bale thlak tura tlan luhtir forward hian, "Number 7 hi a chuang a, chuvang chuan ka thlang a ni," tiin a insawifiah a, tunah chuan khelmualah a insawifiah ta - amah sawiseltute ngawih hun a thleng ve ta.

Season hmasa lawk kha chuan Real tana ṭha tawk loah ngaiin Lyon-ah chhuahtir a ni a, goal 21 a khung sak - a hunlaia Spain coach, tuna Real manager ni ta Julen Lopetegui chuan Spain tana khel tura an enthlak thu a sawi a, tunah erawh Real-ah an inhrawn ta thung.