Chhinga Veng mipui tan chak kan duh - Coach Sanga

Mc Dowell's No. 1 Soda Mizoram Premier League Season 7-ah champion lai Chhinga Veng an la chak vek a, Lalsangzuala Hmar hote hian tun season-ah an khingpui la hneh vek bawkin MFA Super Cup leh I Day Football-ah an champion tawh bawk.

Amaherawhchu, Chhingcows hian MFA hnuaia inelna lianah a zawnin vawi nga champion tawh mah se vawiin tlaia dar 4:00-a an khingpui tur Ramhlun North erawh an la hneh ngai lo. Chuvangin Chhingcows leh Ramhlun North inkhel hian ngaihven a hlawh ang.

'Min hneh ngai lo'

Champhai khelmual Chhangphut field-a MPL nghah a nih ṭum khan Ramhlun North ṭan tura zin chhuak supporter-te chuan khelmual an luh ruala an au hla chu 'Chhinga Vengin min hneh ngai lo' tih a ni. Chhingcows-in nomawi ṭhahnem tak an chawi hnuah pawh Ramhlun North-in au hlaah thlak ngai a la awm lo a, vawiin tlaiah pawh he au hla bawk hi an rawn hmang thei ang.

Chhinga Veng coach Lalsangzuala Hmar chuan, "Ramhlun North kan hneh loh avangin kan champion loh phah chuang lo a, kan nomawi chawina tur daltu chu ni se he record hi a pawimawh. A nih hran loh avangn keimahah chuan nghawng a nei lo a, ka player-te fuih nan pawh hman ka tum lo. Amaherawhchu vengchhung mipui zingah la na hi awm theih a ni a, chuvangin min ṭantute lawm nan chak ngei kan tum ang," tiin Vanglaini a hrilh.

Ramhlun North coach F. Lalrozara chuan, "Record hian kan team a fuih phur a, inthlahdul erawh a thiang lo. Record chhawm nung turin kan theihtawp kan chhuah zel ang," tiin a sawi.