Nadal a chawl rih dawn

Rafael Nadal chuan a khup na vangin tun hnaiah match a khel thei lo a, world number 1 hi October thlaa khelh tur China Open leh Shanghai Masters tournament-ah pawh a hmel a inlan dawn lo.

Kum 32 mi Nadal hi tun thla tir khan US Open-ah inlanin, semifinal an khelh laiin a khup hliam vangin a khel zui thei lo. Spain tan Davis Cup a khel thei lo zui bawk a, inelna pahnihah hian inlan tumin hming pe hman mah se a inhnukdawk leh ta zawk a ni.

Grand Slam vawi 17 champion tawh Nadal hian tun hma pawhin a khupah hliam a lo nei tawh a, beisei anga a dam chho a nih chuan October thla tawpa khelh tur Paris Masters-ah chuan inlan thei ngei tura beisei a ni.

Spanish player Nadal chuan, "Ka khup hliam chungchangah thu thar ṭha lam a awm thei rih lo, min enkawltu leh ka team te nen kan sawi khawm hnuah Asian tour neih loh mai kan ti a, ka chawlh chhungin hliam pawh ka dam hman ngei ka beisei," tiin a sawi.

Season khat chhunga inelna lian Grand Slam pali an khelh zawh hnuah Asian tour hi neih ṭhin a ni a, October 1 aṭanga khelh tur China Open bakah October 7 aṭanga khelh tur Shanghai Masters te hi inelna ngaihhlut zingah a tel.

Inkhel thei rih lo mah se Nadal hi season tawpa a thiam pariat ten an khelh tur - ATP World Tour Finals atan a tling chiang tawh. A kum tam deuh tawh mah se tun hnai season hnih chhungin major tournament final vawi li a la khel thei.