Chawnpuiin Electric Veng kaltluang chelh
Mc Dowell's No. 1 Soda Mizoram Premier League Season 7-ah Electric Veng FC-in Aizawl FC leh Mizoram Police hnehin season bul ṭan mah se, nimin tlai inkhelah Chawnpui FC nen goal awm loa an inhnehtawk avangin an chak tluang lai chu tihtawpin a awm.
Kar leh hian round hnih khelh a ni dawn a, Electric Veng leh Chawnpui hian Bethlehem Vengthlang FC leh Chanmari FC te an hmachhawn ve ve ang.
Incho tawn
MPL club thar pahnihte rinlawk ang ngeiin an inhlau lo tawn ve ve a, attacking football hmuh nghal a ni. Electric Veng an che ṭha hmasa a, Mizoram Police laka chakna goal khungtu David Lalchhuanawma'n chance ṭha tak a hlah.
First half tawp lamah erawh Chawnpui goal nawr a na zawk a, hmun hlauhawm laiah freekick vawi thum an hmu a, Ramhlun North laka freekick khungtu Vanlalthanga'n box pawn chiaha mi chu petin goal zawnah a pet lo.
Second half-ah pawh goal hmuh tur a awm lo a, goal chance erawh hmuh tur a awm nual. Electric Veng winger Lalhmangaiha'n ṭha takin lalut mah se a hmawr bawk turin remhriatna a ngah tawk lo a, amah puitu a hmang ṭangkai lo. Salem Veng tlangval David-a'n box chhung aṭangin a pet over bawk.
Electric Veng an chungnung hret a, captain Lalthlamuana hoa inrem Chawnpui tlarhnung an ṭhiat thei lo, inchhuang thei erawh an ni lo. Chawnpuiin EFC keeper Lalrinnunga tan hna harsa siam lo mah se defender tan erawh awm hahdamna hun an pe lo a, David Laltlansanga leh Vanrammawia Ngente te finishing tuai hriam a la ngai hle.
Chan tawka lungawi
Chawnpui coach Laldinthara chuan, "Chak chu kan duh a, MPL-ah point hmuh harsat zia kan hriat avangin draw-ah pawh kan lungawi. Player tinah hmasawnna hmuh tur a awm zel a, chu chu kan lawmna lai a ni," tiin Vanglaini a hrilh.
Electric Veng manager Vanlalsawma Colney chuan, "Chawnpui defender kha man of the match-ah thlan a ni a, chu chuan inkhelh dan hmang a tichiangin ka hria. Chutihrualin tuna la khel ṭha thei kan ni a, Aizawl FC leh Mizoram Police hneh zawhah chuan ṭha taka khelh a har a ni. Player-te kan fuih nasa a, chutichung chuan kan rilru put hmang a dik tawk lo a, Chanmari kan hmachhawn lehnghal dawn avangin insiamṭhat vat a ṭul ang," tiin a sawi.
Chawnpui FC 0 - 0 Electric Veng FC
48% Ball Possession 46%
10(5) Shots (On Target) 12(3)
0 Woodwork 0
3 Corners 3
3 Offsides 4
4 Yellow Card(s) 5
0 Red Card(s) 0