AFC U16-ah Mizo pali tel dawn

2018 AFC Under-16 Championship chu vawiin hian Malaysia-ah khelh ṭan a ni dawn a, India pawhin zan dar 6:15-ah match hmasa ber an khel dawn - Vietnam U16 an hmachhawn ang.

India U16 team-ah hian Mizo rawlthar pali Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te an tel.

October 7 thleng neih tur inelnaah hian team 16 awmin group pali-ah team pali zel awmin ṭhen hran an ni a, a sang pahnih zel hian quarterfinal an lut dawn a ni.

Blue Tigers rawlthar rual hi Group C-ah Vietnam, Iran leh Indonesia te nen an awmho dawn a, a thiam pariat zinga tel hi thil awlsam a ni dawn lo.

India hian semifinal an lut a nih chuan 2019 FIFA Under 17 World Cup khel turin an tling dawn a, hei vang hian inbuatsaihna nei hma turin Malaysia pawh an thleng hma.

Mahse, India coach Bibiano Fernandes chuan semifinal-in an ngaihtuahna a la luah hman loh thu sawiin, "Tuna kan ngaihpawimawh ber chu group stage paltlang a ni a, chumi zawhah quarterfinal-ah rilru kan pe leh ang," a ti a, semifinal ngaihtuah hun a la nih loh thu a sawi.