Lyon lakah Manchester City an mualpho

Champions League nomawi chawi duh Manchester City chu an match hmasa berah an mualpho nghal - Nilaini zan khan Olympique Lyon an mikhual a, 1-2 in an tlawm.

French club tan Maxwel Cornet leh Nabil Fekir ten first half-ah goal khat ve ve an khung a, City tana second half-a Bernardo Silva goal khungin awmzia a nei lo. Lyon hi Ligue 1-a pasarihna ni mek an ni!

Premier League champion tan coach Pep Guardiola chu hrem a nih avangin bench-ah a ṭhu thei lo a, Spanish manager tel loin a player-te an hriam tawk lo a, mual sir aṭanga anmahni puitu coach an mamawh tih a lang.

City hi English club zinga Champions League match lia a zawna tlawm hmasa ber an ni. Season hmasa khan last 16 second leg-ah Basel an hneh lo a, quarterfinal match hnihah Liverpool an hneh lo ve ve bawk.

Ngaihlai Pep!

Season hmasa Champions League quarterfinal-ah City-in Liverpool an hneh lo a, second leg-ah a chet dan mawi tawk lo avangin Pep hi hnawhchhuah a ni a, Nilaini zan inkhelah hian hrem a nihna hi a tuar chiah - Pep-a awm loh a lang.

City hian hun ṭha nei lo erawh an ni lo. Mahse, French defender Aymeric Laporte chuan Ilkay Gundogan siamsak ṭha tak chu goal-ah a chantir thei lo a, Lyon goalkeeper Anthony Lopes chuan Gabriel Jesus leh Sergio Aguero te hun neih chu ṭha zetin a dan sak bawk.

Lyon erawhin goal khung kawngah harsatna an tawk ve lo. Captain Nabil Fekir ke aṭanga ball chhuak chu Fabian Delph-a'n a pet chhuak thei lo a, ball lo changtu Cornet chuan goal-ah a chantir.

Minute 43-naah Fekir a inlan ve leh a, nipui laia Liverpool-in lakluh tuma an hel attacking midfielder hian yard 25 vela hla aṭangin an goal hnihna a khung.

Aw Bernardo!

Etihad Stadium-ah City-in si hnih phur chungin chawlhlawk an hmang a, Premier League champion lai tan beisei ang inkhel a ni lo. Minute 67-naah City beiseina a nung thar a, Bernardo Silva chuan si phurh a sut ṭhen.

Mahse, hun tawp thlengin City-in goal dang an hlawh chhuak tawh lo a, Group F inkhel dangah Shakhtar Donetsk leh Hoffenheim chu 2-2 a an inhnehtawk bawk avangin an group thunun tura ngaih City hi tunah chuan a mawngphahah an awm.

Pep-a tan hmuh nuam lo tak tur pakhat a awm - City tan first team match khat pawh khel loa August-a Lyon pantu Jason Denayer chu French club tan player ṭangkai a ni a, tlarhnungah a ding nghet hle.

Manchester United forward hlui Memphis Depay-a'n goal khung lo mah se a khel ṭha a, a post tih per chu a ui ve khawp ang.