Chhinga Vengin Ramhlun North an hneh ta
Mc Dowell's No. 1 Soda Mizoram Premier League Season 7-ah Chhinga Veng FC chuan tun hmaa an hneh theih ngai loh Ramhlun North chu 2-1 in an lehthal.
Nimin tlai inkhel hmuhnawm takah Ramhlun North-in Laldingngheta hmangin hma an hruai a. Chhinga Vengin Lalromawia penalty hmangin an sut a, hemi hnu hian Chhinga Veng keeper Zothanmawia'n penalty a dang a, injury time-ah substitute F. Zosangliana'n chakna goal a khung.
A ngaihnawm
Chhinga Vengin Ramhlun North an hneh thei lo - hei hi tun mai a ni loin first division-a an awm dun hun lai aṭang tawh a in ṭan a ni. Chhingcows hian an record duhawm loh tak hi tih tawp an duh a, amaherawhchu nimin tlai inkhelah hian tlarhmaa player pawimawh pathum chu an chhawr thei lo vek.
Ramhlun North pawhin tum mumal tak an neih avangin an foreign striker Waheed Adekunle chu bench-ah an ṭhut tir thung.
An intawng ta
Ramhlun North-in inrintawkna an ngah a, goal chance pawh an nei ṭha. Minute 22-naah Lalliansanga ball pek fing tak chu Laldingngheta'n la lutin chiang zetin a pet goal.
Goal luh hnuah pawh Ramhlun North an khel ṭha chhunzawm a, Lalmawizuala leh K. Lalnunzama ten a hmawr an bawk fuh thei lo.
Penalty pahnih
Second half-ah Chhinga Vengin harh tharna an chang a, inkhel kalhmang a dang bawk. Chhingcows forward Lalrammawia'n hnai tak aṭangin a tauh over a, Sawleng tlangvalin goal zawna a tauh erawh Ramhlun North keeper Liansangpuia'n a dang.
Champion lai an vannei zui a, handball vanga an penalty hmuh chu minute 71-naah Romawia'n a khung. Chhinga Veng defender PC Laldinpuia handball vangin Ramhlun North-in penalty an hmu ve leh a, Notea rawn pen chhuakin keeper T. Mawia'n a dang - Chhingcows beiseina a chhi nung.
An hneh ta
Chhinga Veng an phur zel a, mipui thawm pawh a ṭha. Injury time-ah Ramhlun North-in ball naran tak lo kal chu an pet chhuak mai lo a, substitute Sanga chuan nangchingin box chhung aṭangin mawi zetin a volley goal.
Goal a lu chiah hian MFA Super Cup, I Day Football leh MPL champion-te hi 'final' ang maiin an lawm a, an la hneh ngai loh an hnehna tur a ni tlat!
Tun hnaia tualchhung football-a record nei ṭha ber lawr lak Lalsangzuala Hmar pawhin a chetzia hmangin a lawm zia a lantir a, a sawi lawk ang ngeiin an hnehna chan hi Chhinga Veng mipui tan a hlan a ni.
Chhinga Veng FC 2 - 1 Ramhlun North FC
CVFC : Lalromawia 71'
RNFC : Laldingngheta 22'; F. Zosangliana 90+3'
MoM : Zothanmawia, CVFC
50% Ball Possession 50%
17(9) Shots (On Target) 8(5)
0 Woodwork 0
6 Corners 1
2 Offsides 1
1 Yellow Card(s) 2
0 Red Card(s) 0