September 27-ah Ronaldo chungchang a chiang dawn

Juventus tana Champions League match a khelh hmasak berah Cristiano Ronaldo hnawhchhuah a ni a, hremna a hmachhawn chen tur hi UEFA chuan September 27-ah a chian tur thu an sawi.

Kum 33 mi Ronaldo hi Valencia defender Jeison Murillo a kek nia ngaih a nih vangin UCL-ah a vawi khat nan red card pek a ni a, replay en a nih hnuah erawh Portuguese forward hian an khingpui lu a khawih zauh niin a lang.

Hnawhchhuah a nih avangin match khat chu hremna a tawk chiang dawn a, Swiss club Young Boys a hmachhawn dawn lo, straight red card a nih avangin match thum hrem theih a ni bawk. Match thum hrem a nih chuan a club hlui Manchetser United khelmualah a lenglut thei dawn lo.

Italian champion hian UCL lamah chhawr thei lo mah se Serie A-ah chuan an forward hi an hmang thei ang. Serie A hmahruaitu hian Thawhṭanni zanah Frosinone an lenchilh ang.