Anthony Joshua a zam ru?

British fighter rothap Anthony Joshua chuan Pathianni zing dar 2:30 khian Alexander Povetkin a hmachhawn dawn a, WBA, WBO leh IBF world heavyweight kawnghren kawl mektu hian, "Boruak a sang dawn a ni," tiin an inhnek tur a thlirlawk.

Joshua hmaa ding tur Povetkin hi kum 39 mi a ni tawh a, British boxer hi a hneh lo a nih chuan title fight a neih leh kher a beiseiawm tawh lo. Joshua chuan, "Povetkin tan chuan kan fight tur hi engkima engkim a ni a, a theihna zawng zawng a pe dawn a ni.

"Kei pawh ṭum dang zawng aia ka chet ṭhat leh tawrh chhel a ngai dawn a, Povetkin hian world champion nih a duh a ni," tiin a hmaa ding tur boxer chu hmachhawn a hautak tur thu a sawi.

Mipui 80,000 hmaa inlan tur Joshua chuan, "Dik taka sawi chuan pressure a na a ni. Rilru hahdam tak anga langin in hmaah in pho chhuak mah ila a harsa dawn a, hnehna chan theih dan ka zawng ang," a ti a, an inhnek tur a urlawk.

Kum 28 mi Joshua hian vawi 21 inhnek a hmachhawn tawhah a khingpuite a knockout vek a, hnehna a chang leh a nih chuan Deontay Wilder emaw Tyson Fury a hmachhawn ang - hei hi khawvel hmuh chak a ni.

Hetihrual hian Joshua'n a sawi ang ngeiin Povetkin hi awlsam taka hneh tur chu a ni bik lo ang. Russian boxer hian vawi 35 fight a hmachhawn tawhah vawi 34 hnehna a chang thei a, vawi khat chiah tlawmin vawi 24 a khingpui a knockout.