Mizoram-a Baby League kalpui dan tur hrilhfiah

All India Football Federation leh Mizoram Football Association ṭangkawp chuan nimin khan Baby League seminar an buatsaih a, district hrang hrang aṭangin mi 16 an tel. Mimal leh pawl tan Baby League hi kalpui theih a ni dawn a, AIFF hnen aṭangin ṭanpuina Rs 85,000 a dawn theih ang.

Seminar chu

Lammuala MFA Office-a hun hmanah hian AIFF Baby League manager Srinivasan Saimani chuan kum 4-13 inkarin football an zirna tur kalphung thar hi a zirtir a, naupangte'n football zirna piah lamah a taka an inkhelh theihna (competitive game) buatsaih a ṭul thu a sawi.

MFA development officer Samson Ramengmawia'n Baby League kalpui dan tura ruahmanna awmte a sawifiah a, he hun hi MFA joint secretary C. Vanlalmawia'n a hawng a ni.

Mizoram hi AIFF chuan grassroots football kalpui ṭanna atan a lo thlang tawh a, naupangin football an zir dan kalphung thar tur Baby League hi AIFF hian tun hnaiah a kalpui chho mek a ni.

Baby League chu

Mizoram chhunga Baby League hmasa ber chu November 11, 2017 khan Champhaia Chhangphut Field-ah 8One Foundation, New Delhi, MFA leh Champhai DFA- ten bul an ṭan a, Young Legend's League (YLL) hming vuahin hlawhtling takin a vawi khatna zawh a ni tawh.

Tun ṭuma Baby League-ah erawh India rama football thuneitu sang ber AIFF an inrawlh thung a, anni hian ṭanpui tlaka Baby League kalpuite sum faiin an ṭanpui dawn a ni.

Baby League buatsaih duh tan MFA Office-ah form lakchhuah tur a ni a, MFA development officer-in hriat tur ṭulte a lo hrilhfiah thei ang. Samson-a chuan, "Inelna buatsaih dan tur hi AIFF-in fel takin a rawn duang a, Single Band leh Dual Band-ah ṭhen hran a ni. Single Band-ah hian a tlem berah category li an awm a ngai a, category tin kum bithliah hi thla 12 inkar zela siam tur a ni a. Dual Band-ah hian category tin kum bi thliah hi thla 12 tal a nih a ngai a, category thum a awm ngei ngei a ngai bawk," tiin Vanglaini a hrilh.

Sum lama AIFF-in a puih theih dan sawi fiahin Samson-a chuan, "Pawisa dawn theih zat hi Rs 85,000 a ni a. Inelna kalpui ṭan a nih hian endik a ni ang a, an kalpui ṭhat chuan 25% pek nghal a ni ang. Inelna chanve an thlenah 50% pek leh an ni ang a, inelna zawh hunah a bang 25% pek leh tur a ni," a ti.