Champion lai Wozniacki hnehtu Giorgi

Pan Pacific Open champion lai Caroline Wozniacki chu seeded pawh ni phak lo Camila Giorgi lakah 6-2, 2-6, 6-4 in a chak lo a, a zawna vawi thum champion a tumna kawng chu tihtawpa awmin quarterfinal a paltlang ta lo a ni.

Ningani zan inkhel tir lamah Wozniacki a che fuh hmasa zawk a, a khingpui service chhuhsakin 2-0 a ni. Mahse, Giorgi hian mak tak maiin set hmasa bera game hnuhnung paruk a la zawn vek a, set hnihna hloh mah se a hnuhung berah a dingchang zawkah a ṭang bawk.

Italian nula Giorgi hian ball a vaw na hle a, winners vawi 45 ngawt a vaw chhuak thei; hetih lai hian a khingpui Wozniacki hian vawi 14 chiah a nei thei thung. Giorgi-i'n ranking sang zual 10 lakah tun hnai kum li chhunga a chak lehna hmasa ber a tawng a, Wozniacki lakah erawh vawi thum a chakna a ni thung.

Inkhel dangah British number 1 Johanna Konta chu Donna Vekic lakah 6-3, 7-5 in a tlawm. Croatian nula hian hnehna chang turin darkar khat leh minute 22 chhung hun a hmang.

Vekic hian a match hmasa lamah nikum US Open champion Sloane Stephens a hneh tawh bawk a, a match lehpekah chuan Caroline Garcia nen an inkhel leh ang. Garcia hian quarterfinal lut turin Anastasia Pavlyuchenkova chu 6-4, 2-6, 7-5 in a lo hneh ve bawk a ni.