Thiem-a'n quarterfinal a lut

St Petersburg Open khelh mekah seeded pakhatna Dominic Thiem chuan quarterfinal a in vaw kai a, tun tennis season chhungin ATP Tour quarterfinal a vawi 12 luhna chiah a ni.

Ningani zan khan Austrian tlangval hian Jan-Lennard Struff chu 7-6 (7-4), 6-4 in a hneh a, kuminah match 45 a chakna chiah ni bawkin world number 1 Rafael Nadal leh Alexander Zverev te nen hnehna chang hnem pathum an ni mek.

Thiem hi awlsam takin a chak mai bik lo, a khingpui Struff hian set hnihna an khelh laiin break point vawi thum a nei a, mahse a chhawr ṭangkai thei lo. Quarterfinal-ah chuan Daniil Medvedev nen an inhmachhawn leh ang, inkhel dangah Medvedev hian Mikhail Kukushkin a hneh ve bawk.

Inkhel dangah kum 36 mi Mikhail Youzhny chu Roberto Bautista Agut lakah 7-6 (8-6), 3-6, 6-3 in a chak lo. Russian tlangval Youzhny hian ATP Tour match 499 a khel tawh a, tun ṭum hi a match hnuhnung ber a ni ta.

Youzhny chuan, "A tir aṭanga a tawp thleng khan puitling takin ka awm chuan ka hria, ka match hnuhnung ber kha kan thlir chuan taksa chak loh hnua chawl ka ni bik lo tih in hre thei ang," tiin a hun hnuhnungah pawh theihtawp chhuahin a la inkhel thei hlea a hriat thu a sawi.

Champion lai Damir Dzumhur pawhin last 16 a paltlang, ani hian quarterfinal-ah Grand Slam vawi thum champion tawh Stan Wawrinka a hmachhawn leh ang. Seeded pahnihna Stefanos Tsitsipas leh seeded pasarihna Filip Krajinovic te pawhin hnehna an chang bawk.