Kovak ringtu Franck Ribery

Franck Ribery chuan an manager thar Niko Kovac chungah rinna a nghat ngam a, Croatian manager hi Bayern Munich enkawl tura tling tawk nia ngaiin, "Club lian enkawl tur a ni," a ti.

German champion Bayern hian season kal laiah league match thum khel tawhin hnehna an chang vek a, club 18 zingah anni chiah chak kim thei an ni. Champions League lamah pawh bul ṭan fuhin, an match hmasa berah Benfica chu 2-0 in an hneh bawk.

Kum 46 mi Kovac-a'n tun hmain team lian a la enkawl ngai lo a, a enkawl hnuhnung zawk Eintracht Frankfurt erawh DFB Pokal nomawi chawi chungin a chhuahsan thung - club lian Bayern a enkawl dawn khan ringhleltu tam mah se beisei aia ṭhain an kaltluang mek.

France international hlui Ribery chuan, "Niko hian team lian enkawl turin theihna a nei sang tawk, player tin a hrechiangin kan theihna kawng dang a dap peih hle. Kan mamawh leh hmasawnna tur lai a hmu zung zung a, hun rei lote chhungin hmasawnna kawng khat tal kan neih belh zel.

"Kei chu a nihna ang taka thil sawi mi ka ni a, inbiak pawh tawnna ṭha kan neih chuan kawng a awlsam phah ṭhin. Manager hian player tin a kawm ngeih a, harsatna kan nei a nih pawhin kan thlen hreh lo," tiin coach thar lakah player ten nuam an tih thu a sawi.

A zawna Bundesliga nomawi vawi ruk chawi tawh Bayern Munich hian zanin dar 10:00 hian league match an khel zui leh dawn a, mikhual tana inkhelh harsatna hmun Schalke khelmualah an lenglut ang.