Arsenal leh Chelsea tan hna a awlsam

Pierre-Emerick Aubameyang-a goal hnih hmangin Arsenal chuan Vorskla Poltava 4-2 in an sawp a, inkhel dangah Chelsea pawhin Willian goal khat hmangin PAOK Salonika 1-0 in an hneh bawk - Premier League club lian pahnih tan Europa League group match hmasa berah buaina tur a awm lo.

London club pahnih hian Pathianni zanah league match an khel lehnghal dawn. Dar 6:00-ah London Derby kan hmun zui dawn - Blues hi West Ham hmachhawn turin an zin chhuak dawn a ni. Gunners pawhin dar 8:30 hian Emirates Stadium-ah Everton an lo mikhual ve thung ang.

Laipui a puak

Season hmasa khan cup-tied vangin Pierre-Emerick Aubameyang-a'n Arsenal tan Europa League a khel thei lo a, kuminah erawh a bul ṭantu zingah telin thlamuanpui tham a nihzia a lantir nghal.

Ukrainian club lakah Unai Emery nauten inkhel thunun viau mah se goal hmasa ber hmu tur erawhin an nghak rei hle. Alex Iwobi hnen aṭanga a ball hmuh chu Gobon striker hian goal kilah a khung a, minute 32-naah target zawna an pet hmasa ber a lut nghal.

England forward Danny Welbeck-a'n chawlhlawk hman hnu lawkah Henrikh Mkhitaryan cross tauh lutin goal hnihna a khung a, Aubameyang chuan goalkeeper Bohdan Shust dan theih loha an goal thumna a khung hnuah, substitute Mesut Ozil-a'n goal hnuhnung ber a thawh ve bawk.

Mualneitu lamin si li an phurh hnuah captain Vladimir Chesnakov leh Vyacheslav Sharpar te hmangin sut ṭhen mah se an mualpho a hliah khuh phak lo. Group E inkhel dangah Portuguese club Sporting Lisbon chuan Azerbaijani club FK Qarabag 2-0 in an hneh bawk a ni.

Hmel thar

Arsenal manager Emery-a'n Sevilla a enkawl laiin Europa League nomawi vawi thum a chawi zawn thei a, he inelna bikah hian a vawi 32 nan hnehna a chang - manager zingah ani aia record nei ṭha an awm lo.

Vorskla Poltava hmachhawn turin league match an khelh hnuhnung ber aṭangin player pariat ngawt a siksawi a, Uruguay midfielder Lucas Torreira, Switzerland defender Stephan Lichtsteiner leh Germany goalkeeper Bernd Leno ten a vawi khat nan inkhel bul an ṭan - an hna thawh tur ṭheuh an thawk ṭha thawkhat hle.

Emery-a'n kum 18 mi Emile Smith-Rowe lakah rinna a nghat ngam a, Under-17 World Cup champion team zinga tel midfielder hian khelmual chhungah minute 20 hun a hman chhungin a khel chhe lo. Vorskla lam goal nawr a chhu chat fo a, amah ringtu manager beiseina a ti thlawn lo.

Gunners manager chuan, "Match khelh tur kan ngah a, chuvangin player chhawr theih kan ngah a ngai. Ṭhenkhat tan hun siamsak an ni a, beisei ang ngeiin an khel ṭha bawk, khelmual lut ngun zawkte aimahin an khel ṭha zawk emaw tih mai tur a ni," tiin a naute a fak thiam hle.

Buaina a ni thei?

Greece club PAOK Salonika khelmualah hnehna chang mah se, Chelsea manager Maurizio Sarri chuan an tan Europa League chu buaina a nih theih thu a sawi.

2013 Europa League champion Blues tan hnehna chang turin Willian goal khat a tawk a, Brazil international hian Ross Barkley hnen aṭanga a ball hmuh a khung a ni.

Chelsea manager Sarri chuan, "English club tan chuan Europa League hi a harsa a ni. Italy-ah kha chuan, Greece-ah kan zin chhuak a nih chuan Thawhṭanni zana league match khel turin kan dil thei, hetah chuan darkar 63 chhungin match kan neih lehnghal a ngai a ni. Nakinah chuan eng nge thleng zel dawn erawh ka hre lo.

"Tunah chuan kan tan harsatna a la ni lo mai thei, match ruk chiah kan la khel a ni. Mahse, nakinah chuan buaina min siamsak tu a la ni thei. Duhthusam ang chuan group match pahnih emaw pakhat emaw khelh hmabak nei chunga tlang kan tum ang," tiin a sawi.

Hazard tel lohna

Premier League hmahruaitu Chelsea hi chak tur chianga ngaih an ni a, Cardiff an sawp ṭuma inlan player panga ngawt chu dah ṭhat an ni. Eden Hazard bakah David Luiz leh Mateo Kovacic te chu squad-ah awm loin, Cesar Azpilicueta leh Olivier Giroud te chu bench aṭanga luhtir an ni thung.

Tlarhma laiah Alvaro Morata chu hmun pek a ni a, Real Madrid striker hlui hian Pedro cross chu hnai tak aṭangin a tauh lut lo a, Antonio Rudiger hnen aṭanga a ball hmuh ṭha tak chu holam takin goal pawnah a pet bawk.

Season tirah Morata hi chhawr zawk ni mah se, Cardiff lakah erawh Giroud chu thlan zawk a ni. France international striker hian goal khung lo mah se Hazard khung tur vawi hnih a siamsak a, Belgium midfielder hian a fak hle. Striker pakhat chauh an hman chhunzawm dawn a nih chuan hmun inchuh boruak a sang chho hle tura ngaih a ni.

Italian manager Sarri chuan, "Morata khan hun ṭha vawi li vel a nei a, mahse a vannei tawk lo. Nakinah chuan inrintawkna a neih theih ngei ka ring, chumi tur chuan ka pui bawk ang. Chutihrualin inrintawkna chu goal khung huna rawn awm tur a ni a, keiin ka pek theih a ni lo thung. Tun season a inkhelh tawh zingah chuan box chhunga a chet fuh ber ṭum ni hialin ka hria," tiin a striker chungchang a sawi.

Europe - UEFA Europa League
Villarreal 2 - 2 Rangers
Rapid Wien 2 - 0 Spartak Moskva
Sevilla 5 - 1 Standard Liege
Akhisarspor 0 - 1 Krasnodar
Marseille 1 - 2 Eintracht Franfurt
Lazio 2 - 1 Apollon
Rennes 2 - 1 Jablonec
Dynamo Kyiv 2 - 2 Astana
Besiktas 3 - 1 Sarpsborg 08
Genk 2 - 0 Malmo
PAOK 0 - 1 Chelsea
Vidi 0 - 2 BATE
AEK Larnaca 0 - 1 Zurich
Ludogorets 2 - 3 Bayer Leverkusen
RB Leipzig 2 - 3 Salzburg
Celtic 1 - 0 Rosenborg
Slavia Praha 1 - 0 Bordeaux
Kobenhavn 1 - 1 Zenit
Spartak Trnava 1 - 0 Anderlecht
Dinamo Zagreb 4 - 1 Fenerbahce
Sporting CP 2 - 0 Qarabag
Arsenal 4 - 2 Vorskla
F91 Dudelange 0 - 1 Milan
Olympiakos 0 - 0 Real Betis