Bethlehem Vengthlang vanduai a kaltluang
Mc Dowell's No. 1 Soda Mizoram Premier League Season 7 match thum khelh tawh aṭanga point la hmu lo awmchhun chu Bethlehem Vengthlang FC an ni a, tawi fel taka an dinhmun sawifiah dan chu 'an vanduai' tih a ni.
Ningani zan Lammual inkhelah Chanmariin Lalnun-zama hmangin minute 23-naah hma an hruai a, BVT-in PC Vanlalhruaia hmangin minute 59-naah an sut a, an inhnehtawk dawn emaw tih hnuah minute 88-naah Mark K. Zothanpuia'n Chanmari chakna goal a khung.
Zama leh goal
Chanmari FC-in MPL7-ah an veng rawlthar Lalnunzama chu tlarhmaah rinrawlah an hmang a, Khelo India best player hi a kum enin la nuapang deuh mah se mawhphurna a la zo hle. Zama hian match thum a khelh tawhah goal a la khung vek a, Ramhlun North leh Electric Veng an hmachhawn ṭumin a lu hmangin a khung a, BVT nen hian a ke dinglam hmangin a khung.
Zama hian minute 23-naah left back Lalmuanawma hnen aṭanga a ball hmuh chu box chhungah a la lut a, a ṭhiante pass tur awm mah se inringtawk takin goal-ah a pet a, BVT keeper Lallawmzuala'n a dang thei lo.
Chanmari rawlthar hian goal a khung ringawt lo a, minute 90 chhung khel tluanin BVT tlarhnung te awm nuamin a awm tir lo.
Beisei nei BVT
First half-ah inkhel a nung tawk lo a, BVT-in halftime hmang ṭangkaiin second half-ah inkhel a danglam. Coach H. Lalhlimpuia enkawl team goal nawr a na sawt a, midfielder C. Lalrintluanga ball petin crossbar per dawp mah se goal chhungah a lut lo chiah chiah.
Chanmari FC-in an khingpuite an nung thar tih an hre nachungin dan ngaihna an hre lo a, BVT-in box chhung handball vanga 'penalty shout' an neih chu referee-in a ṭawmpui lo. Amaherawhchu, minute 59-naah Chhinga Veng aṭanga loan hmanga an lakluh Shalom Lala ball fing tak chu substitute Hruaia'n a ti goal a, inkhel a nun phah hle.
Vannei tura huaisenna
Chanmari coach Lalruatliana Sailo (Tawia) chuan a tuang a tichhah lui a, inkhela an chung-nung lo zawk chungin team ṭha zawk an ni tih nemngheh nan attacking player a luhtir zel a, defender pathum chauh a khelh tir ngam.
Hun tawpah erawh Tawia'n a huaisen rah a seng a, minute 88-naah substitute Mark-a chuan 25 yard vel aṭangin kawh zetin a pet a, goal ban perin a lut a. Hun a tlem tawh avangin thawhchhuah ngaihna a awm tawh lo.
An la beidawng lo
BVT coach H. Lalhlimpuia chuan, "Kan vanduai ṭhin khawp mai. Amaherawhchu kan vanduai reng bik lo ang, Pathian zarah kan naute hi an down ve duh loh na hian chakna min la pek ka ring tlat a ni," tiin an la beidawn loh thu a sawi.
Hlima chuan sawi chhun-zawmin, "Veng chhung mipui min puihna leh club thuneitu BOD min support-na hi a lawmawm a, result kan nei ṭha lo erawh hrehawm kan ti," tiin Vanglaini a hrilh.
Chanmari FC 2 - 1 Bethelehem VT FC
CFC : Lalnunzama 23'; Mark K. Zothanpuia 88'
BVT : PC Vanlalhruaia 59'
MoM : Mark K. Zothanpuia, CFC
48% Ball Possession 52%
15(5) Shots (On Target) 13(7)
1 Woodwork 1
5 Corners 3
1 Offsides 0
2 Yellow Card(s) 2
0 Red Card(s) 0