Kan la hnufual deuh a ni - Mizoram captain
Cricket hmanga India ramchhung one-day hmanga inelna sang ber Vijay Hazare Trophy-ah Mizoram chu a vawi khat nan an inlan a, match hnih khel tawhin Arunachal Pradesh leh Meghalaya te an hneh lo ve ve a. Pathianni chawhma dar 9:00 hian Plate Group-a team ṭha ber zinga mi Puducherry nen an inhmachhawn leh ang.
Mizoram captain K. Vanlalruata chuan, "Kan tan chuan engkim hi thil thar vek a la ni a. Pawl khat zirlaiin pawl ruk leh pawl sarih zirlai ho bula tualchai ve ang vel kan la ni e," tiin state dang lakah an la hnufual thu a sawi.
Mizoram ang thoin NorthEast state tam zawk tan tun ṭum Vijay Hazare Trophy hi an vawi khat khelhna a ni hlawm a, hetichunga Mizoram hniam bikna chhan zawhna chhangin Ruata chuan, "Team dang Sikkim, Arunachal, Meghalaya, Nagaland, Manipur leh a dangte hi chu BCCI-ah associate member pawh kum 10 vel lo ni tawh an ni a, senior chiah hi khel loh an neih chhun a ni a, age group hrang hranga BCCI hnuaia lo khel sil tawh ho kha tunah an chhawr ṭan a, tin an player-te hi NCA vela lo train deuh vek ho kha an nia. Tawnhriat kan la inneih tam hleih deuh a ni," tiin team dang ṭhatna chhan Vanglaini a hrilh.
An inkhelh tawhna chungchang sawiin Ruata chuan, "Arunachal lakah kha chuan kan experience loh a lang a. Hneh ve ṭep chu kan ni. Kan inhnehtawk thaw khat hle. Meghalaya erawh keini aia kum tam taka lo advance tawh an ni a, zep thu awm lo, kan la patuai deuh a ni," tiin a sawi.
Meghalaya nena an inkhelh ṭum hian captain Ruata hian run 34 a siam a, match hmasa bera century siamtu Taruwar Kohli-a'n run 90 siam bawkin player dang zingah double digit siam pha an awm lo a, over 43.4-ah run 154 siamin an thi fai vek. Meghalaya bat hun a thleng a, opener Biswa-a duck out bakah a kawppui Rajesh S (13 runs) che ṭha lo mah se Punit Bisht (95) leh JJ Lamare (41) ten thi loin over 27.3-ah target an vaw chhuak.
Mizoram result leh khelh hmabak
September 19, Nilaini
Mizoram (234/8) - (237/6) Arunachal Pradesh
Arunachal wicket liin an chak
September 20, Ningani
Mizoram (154) - (155/2) Meghalaya
Meghalaya wicket riatin an chak
September 23, Pathianni
Mizoram Vs Puducherry