United an buai, City an insiamṭha

Manchester khawpui hmel a inthlak hret hret a, Premier League-a record nei ṭha ber Manchester United-in Sir Alex Ferguson-a chhuah hnuah Premier League nomawi an chawi leh tawh lo a. Tun season-ah pawh match ruk lek an la khel chungin United hian an hmelma Liverpool chu point riatin an pha lo a, Sir Alex-a'n ṭhenawm bengchheng tia a sawi Manchester City pawh champion lai chauh ni loin Jose Mourinho hote aiin point rukin an sang tawh zawk.

Manchester club inkhel
Inrinni zan khan Old Trafford-ah United-in kai thar Wolverhampton lakah Fred-a goal tawih tak hmangin minute 18-naah hma hruai mah se Championship champion hian Joao Moutinho hmangin minute 53-naah an sut a, 1-1 in inkhel a tawp.

Pep Guardiola hote erawh Champions League-ah mualpho mah se Cardiff City lakah an thinrimna an hri thla a, khualmualah 5-0 zetin hnehna an chang. City tan hian Sergio Agüero (32'), Bernardo Silva (35'), Ilkay Gündogan (44') leh Riyad Mahrez (67', 89') ten goal an khung.

Lawm a kim lo
United chak lo lai hi Sir Alex Ferguson chuan a hmunah a en a, Scottish manager hi May thla khan thluaka thisen zam chat vangin damdawi-inah an enkawl a, hemi hnua inkhel a en leh hmasak ber a ni.

Kum 27 chhung zet United enkawl theitu Ferguson-a hnathawh an la hre reng a, a ṭhutna lam a pan lai hian stadium-a thu puangtu chuan 'kan ta liau liau leh kan club history-a mi ropui ber zinga mi' tiin a puang a. Mipui pawhin minute 27-naah chiah standing ovation an pe a, Ferguson pawhin a kut khing hnih a phar chhuak bawk.

Amaherawhchu minute 90 a zawh chuan United-in point thum an hlawh chhuak thei lo a, season ṭantir chauh a la ni nachungin Mourinho hoin nomawi kawng an hre tawh lo tiin a sawi theih der tawh.

Chan tawk hmu United
Manchester United manager Jose Mourinho chuan, "Keini aiin bul an ṭan ṭha a, chak duhna thinlung an ngah zawk a. Keini erawhin hrem kan phu a, kan la lap lutuk a, kan chan tawk kan hmu," tiin player-te an theihna anga an khelh loh thu a sawi.

United hian Thawhlehni zan hian League Cup-ah Derby County an hmachhawn dawn a, Inrinni zanah West Ham an tlawh leh ang a, insiamṭhat nan an mamawh ang.

Pep a lawm
United manager Mourinho chhuah duhtu an tam laiin Pep erawh a nghet tulh tulh. Champions League-ah hrem vangin technical area-ah a ṭhu lo a, tunah erawh a awm tawh. Spanish manager chuan, "Ka khel ve lo a, an mamawh huna hrilh turin kan awm. Team ngai tho kha an ni a, an chak loh hnuah ṭha takin an khel leh thei a, an chungah ka lawm. Season khat chauh ni loin season hnih chhung lawmna min pe tawh a, an bulah ka awm zel ang," tiin a hnathawh nuam a tih thu a sawi.

City hian Thawhlehni zan hian League Cup khel turin Oxford an tlawh ang a, Inrinni zanah Brighton & Hove Albion an mikhual leh ang.