AFC U16 Championship 2018 Indian rawlthar an chak nghal

AFC Under 16 Championship 2018-a an match hmasa berah India U16-in hnehna an chang nghal a, Vietnam U16 chu 1-0 in an hneh.

Blue Tigers rawlthar rual hian goal khung tur erawhin minute 80 hnu lam thleng an nghah thlen a ngai a, Vikram Singh chuan minute 86-naah ama penalty hlawhchhuah khungin India a chakpui.

India U16-ah hian Mizo rawlthar pali Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng midfielder Lalchhanhima Sailo te an tel a, Inrinni zanah hian Chhantea chiah a inlan thung.

Armed Veng rawlthar hi bench aṭanga luhtir a ni a, minute 66-naah Vietnam tlarhnung mawi zeta ṭhiatin goal khungna remchang nei mah se keeper chiah hmachhawn chungin goal a khung thei lo.

India hi vawiin chawhnu dar 2:00-ah an inlan lehnghal dawn a, Iran U16 nen an inkhel ang.