Aizawl FC-in Police harsatna belhchhah

I League club Aizawl FC chuan Mizoram Premier League Season 7-a an chakna hmasa ber ni turin Zirtawpni zan khan Mizoram Police chu 3-1 in an hneh.

Police-in match hmasa bera Bethlehem Vengthlang 1-0 a an hneh hram hnuah Electric Veng leh Aizawl FC te an hneh lo. I League tan erawh chanchin lawmawm a ni a, Electric Veng hneh loin bul an ṭan a, Chanmari nen an inhnehtawk zui avangin point thum hi an mamawh takzet.

Goal leh a chhehvel

Mizoram Police an sawiselna chu tlarhnung pawp a ni a, I League club nen pawh hian AFC defender Govin Singh-a vawrh luh chu Alfred Kemah Jaryan-a'n a tauh lut nghal. Goal luh hun hi minute 9-na lek a ni a, Police tlarhnung an muthlu.

Aizawl FC tlarhnung a phui bik lo a, Police-in vawi tam rum ṭhaihin Lalbiakhlua ball vawrhluh Lalfakzuala volley nghal te chu goal lo mah se mipui tan hmuhnawm a tling.

Second half-ah Chanmari FC nena man of the match Isak Vanlalruatfela-a cross chu Alfred-a'n goal-ah a chantir a, minute 52-naah 2-0 a ni.

Police-in beiseina nei turin penalty an hmu ve lehnghal a, Lalramtharmawia'n minute sarih hnuah an siphurh a sut ṭhen. Inkhel boruak a nung chho a, minute 90 chhung referee Lalhriatpuia Sailo-in yellow card pariat zet a phawrh.

Minute 85-naah Lalrinfela'n chak nemnghehna goal a khung a, hla tak aṭangin kawh zetin box pawn aṭangin a pet kul a, Police keeper Lalṭanpuia tan dan ngaihna a wm lo.

Engtin zel?

Tunkar hian MPL match hnih a awm dawn a, Nilaini zanah Aizawl FC-in Chhinga Veng an hmachhawn ang a, Zirtawpni zanah Ramhlun North an khelhpui leh nghal dawn.

Gift Raikhan-a hote hian hnehna chang mah se inchhuang thei an ni lo a, I League club danglamna an la lantir thei lo a, khelh dan phung nghet an la nei lo.

Aizawl FC-in an foreigner ziah luh pahnih Francis Dadzie leh Amadou Alou Sissoko te visa a fel theih loh avangin midang an melh a, Churchill Brothers leh Mohun Bagan forward hlui Ansumana Kromah an lalut. Liberian forward hi a chet ran avangin MPL hmuhnawmna a belhchhah thei ang.

Police erawhin an tlarhnung siam ṭhat tumin Aizawl FC nen khelh dan thar an enchhin a, a hlawhtling lo. Lalbiaksanga Colney hote hian Nilaini tlaiah chak la nei lo Ramhlun North an khel ang a, Zirtawpni tlaiah la chak vek Chhingcows an khel dawn a, hmabak a hautak hle.

Season liam ta khan Police hian round 5-na zawhah pawh point khat chauh an la hmu a, dinhmun chhe tak aṭangin BS-a Colney hian semifinal a thlenpui thei a, Armed Veng pachal hian an player thar training neite a chhawr theih huna hmabak a harsat lutuk loh nan ruahmanna ṭha zawk a duan chhuah ran a ṭul ang.

Mizoram Police 1 - 3 Aizawl FC
MPFC : Lalramtharmawia 59'
AFC : Alfred Kemah Jaryan 9', 52'; Lalrinfela 85'
51% Ball Possession 49%
12(6) Shots (On Target) 20(6)
0 Woodwork 0
5 Corners 4
1 Offsides 4
2 Yellow Card(s) 6
0 Red Card(s) 0