Madrid khaw club an chak
La Liga Inrinni zan inkhelah Atletico Madrid leh Real Madrid ten hnehna an chang ve ve a, September 29 zana Madrid derby khel turin team pahnih inpuahchahna a ṭha zel.
Real Madrid hian an mikhual Espanyol chu Marco Asensio goal hmangin 1-0 in an hneh a, Spanish midfielder hi amah ang thoa Spain international Isco nen an khel ṭha dun hle.
Real goalkeeper hlui Diego Lopez chuan Sergio Ramos khung ngei tur nia ngaih chu ṭha zetin a dan sak a, Espanyol striker Borja Iglesias chuan crossbar a pet per ve bawk.
Julen Lopetegui enkawlna hnuaiah Real-in league match nga an khelhna niin an la tlawm miah lo a, he thu buatsaih a nih thleng hi chuan La Liga hmahruaitu an ni - nizana Barcelona inkhel result a zirin an dinhmun hi a danglam leh ang.
League match hnih ngawt a zawna an chak zawh loh hnuah Atletico an chak ve leh ta bawk a, Diego Simeone naute hian an mikhualna ramah Getafe chu 2-0 in an hneh.
Thomas Lemar goal shot-in Getafe keeper David Soria hnung a per hnuah goal-ah a lut a, Lemar vek hian minute 60-naah a khung leh bawk - Getafe winger Ivan Alejo chu minute 67-naah hnawhchhuah a ni a, mualneitu team tan thawhleh ngaihna a awm tawh lo.