A awlsam lo hle - Pochettino

Match thum chhung an tlawm zawn hnuah Tottenham chuan chak ni hmel an hmu ve leh ta, manager Mauricio Pochettino chuan an tan hneh­na chan chu a awlsam loh thu a sawi.

Inrinni zan Premier League inkhelah Spurs hian an mikhualna ramah Brighton chu 2-1 in an va luhchhuah. Chawlhlawk hma hretin Harry Kane-a'n penalty a khung a, second half-ah substitute Erik Lamela chuan an goal hnihna a khung bawk.

Mual neitu lamin Anthony Knoc­kaert hmangin sut mah se goal dang an khung thei tawh lo, a zawnin an khingpuite nen vawi hnih an inhnehtawk tawhna chu a tawp.

Watford, Liverpool leh Inter Milan an hneh loh hnuah Spurs an chak ve leh ta a, league match ruk khelh tawhah point 12 hmuin pangana an ni mek. September thla tir lawka a hneh loh Watford nen Ningani zanah League Cup an khel ang.

Spurs manager Poch chuan, "Hnehna kan chan hi kan tan a lawmawm hle, a nihna takah chuan he hmuna inkhelh hi a harsa hle. A bik takin Brighton hi set piece-ah an hlauhawm hle, an thawhhona a ṭha takzet bawk.

"Mahse, keini lam pawh kan thawk­rim a, hun ṭhenkhatah kha chuan kan chungnung zawk. Kan khingpui kan nawr na a, point thum kan hmuh hi lawmna tur chu a ni ngei mai, chu ai mahin ka naute khelh dan khan min ti lawm," tiin a sawi.

Chak lo Brighton hian point nga chiah an la neih avangin 13-na an ni mek a, an match lehpek atan Inrinni zan hian Etihad Stadium-ah champion lai Manchester City an lenchilh ang.