Auba chhuahsan Arsenal squad a pan
Captain a nihna an hlihsak hnuah an chhawr duh lo zui a, striker Pierre-Emerick Aubameyang tan a rang lama Arsenal chhuahsan chu tih makmawh a ni. Transfer tawp niah Gabonese striker hian North London chhuahsanin Barcelona a zawm.
Thlasik bazar tawp hmain Auba hian Catalan club hi a zawm fel hman. Gunners tana a contract neih lai tih tawp a nih avangin free transfer hmangin a chhuak thei a, he thuziah lai hian Barcelona-in a contract thar rei zawng hi an la tarlang lo.
Auba a chhuah takah chuan Mikel Arteta-a'n engtiang in nge season chawhnu lamah tlarhma a rem dawn tih hriat a chakawm. Alexandre Lacazette chu tlarhma laia rinrawl a ni dawn, ani hi nipuia a contract zo tur a ni.
Auba buaina
Vantlang hmuhah Arteta hi a ṭawng pung pung ngai lem lo, mahse a duh loh zawngah chuan nawr luih theih a ni lo tih a takin a lang zel. Aubameyang hi chawlh hmanga a chhuah ṭumin haw hun tur bituk aia tlaiah a haw a, captain nihna a hlihsak bakah a chhawr nawn tawh lo.
Gunners tan inelna hrang hranga match 163 aṭanga goal 92 khungtu hi nikum December thla aṭang khan club tan a la inlan leh lo. Africa Cup of Nations khel turin feh chhuak mah se Covid-19 vangin a khel thei lo a, London lamah a kir hma.
North London a thlen leh hnuah lawm a hlawh chuang lo a, atan chuan chhuahna zawn mai kha a fin thlak. Chutih rualin a hlawh phut ang pe thei leh club a khelh duhna hmuh chu thil awlsam a ni bik lo, transfer tawp ni thlengin a chiang hlei thei lo.
A boruak
Mizoram aṭanga teh chuan February 1 zing dar 4:30 khan thlasik bazar hun hi a tawp. Thawhṭanni chhun khan Auba hian mimal thlawhtheihna hmangin Barcelona a pan a, chhunah medical test a nei fel nghal - mahse thil erawh a la fel mai lo.
Sum lama talbuai Barca hian Auba la tur chuan Ousmane Dembele chhuahtir phawt a ngai, a nih loh chuan striker thar hlawh pek tur an nei lo! Hlawh hnem Dembele a chhuak a nih chuan player thar hlawh atan an inseng hnem ve thei deuh dawn tihna a ni.
Mahse, hliamin a tlak buak ngun tak Dembele hi club lian dang duh rawn a ni lem lo. Auba kalsan tur Arsenal hian lak an hreh lo nia sawi a awm, mahse France international hian North London pan tumna a nei lo thung.
A chhuak
Barcelona president Joan Laporta-a'n sum an neih loh thu a zep lo a, chutih rualin Auba lak beiseina an la neih thu a sawi. Hun tepter tawh takah Barca, Arsenal leh Auba ten thutlukna hmanhmawh an siam a ngai - a bikin Auba leh Gunners tan inhnuh hniam a ngai hle.
Mesut Ozil laka an chetsualna ang kha Arsenal hian neih leh an duh tawh lo. Player chhawr loh hnena hlawh tam tak pek reng ai chuan a contract tih tawp an pawi ti lo a, sum ṭhahnem tawk taka la hralh theih tur striker chu an chhuah zalen ta zawk.
Arsenal an inphah hniam a, a la tawp lo. Aubameyang chuan season chawhnu lama pound maktaduai 7.5 a la hlawh theih chu nasa takin a ti hniam - Catalan club aṭang hian pound maktaduai 1.6 chauh hlawh turin thu a ti tlu a, inremna an nei thei chauh a ni.
A hmun ruak
Aubameyang a awm loh chuan Lacazette lakah mawhphurhna a sang zual dawn. Arteta-a'n Auba tel loin Laca, Gabriel Martinelli leh Bukayo Saka te a inkawp remtir viau a, chutih rualin a lai khel tur erawhin Lacazette leh Eddie Nketiah bak a nei dawn lo.
Martinelli hi tlarhma laia khel thei a ni a, chutih rualin Premier League-a rinrawl ni tur chuan a la hriam tawk lo. Hliam tuar thei an ni a, chumi rual chuan hripui leng vanga player chan thei reng an ni bawk - a nihna tak sawi chuan tlarhmaah duh thlan tur an nei tlem takzet.
An duh ber Dusan Vlahovic chu an cho rual a ni lo, kum 22 mi Alexander Isak pawh hlawh a phut zat chu an tlin lo. Season tawp rualin Laca-a contract hi a tawp dawn, nipui bazara Arsenal hna pawimawh ber chu striker zawn a ni ang - Champions League an khelh phak loh chuan zawn hmuh a awlsam lo ang.
Arsenal Squad
Goalkeeper
# Player Kum Contract
1 Aaron Ramsdale 23 2026
2 Bernd Leno 29 2023
Defender
3 Ben White 24 2026
4 Gabriel Magalhaes 24 2025
5 Rob Holding 26 2025
6 Takehiro Tomiyasu 23 2026
7 Kieran Tierney 24 2026
8 Cedric Soares 30 2024
9 Nuno Tavares 22 2026
Midfielder
10 Thomas Partey 28 2025
11 Granit Xhaka 29 2024
12 Sambi Lokonga 22 2026
13 Mohamed Elneny 29 2022
14 Martin Odegaard 23 2025
15 Emile Smith Rowe 21 2026
16 Bukayo Saka 20 2024
Forward
17 Nicolas Pepe 26 2024
18 Alexandre Lacazette 30 2022
19 Eddie Nketiah 22 2022
20 Gabriel Martinelli 20 2025
Loan a chhuak mek
Goalkeeper
1 Runar Alex Runarsson 26 2024
Defender
2 Konstantinos Mavropanos 24 2023
3 William Saliba 20 2024
4 Pablo Mari 28 2024
5 Hector Bellerin 26 2023
Midfielder
6 Matteo Guendouzi 22 2023
7 Lucas Torreira 25 2023
8 Ainsley Maitland-Niles 24 2023