Lampard leh Everton an che ṭha

Everton-in transfer tawp niah manager atan Frank Lampard an lakluh thu an puang a, English manager hian nghawng lian tak a nei nghal. Toffees-in transfer tawp niah player langsar pahnih Dele Alli leh Donny van de Beek te an lalut.

Kum 43 mi Lampard hian tun thla tira an ban Rafael Benitez a thlak. Spanish manager hnuaiah Toffees hi match hnuhnung 14-ah vawi khat chiah an chak a, point 42 hmuh theih aṭangin point ruk chauh an hlawhchhuah avangin relegation battle-ah an tel.

Lampard chuan, "Bul ṭan châkin ka tui a hal, Everton anga club lian leh sulhnu nei ṭha ka enkawl thei hi ka lawm. Everton ṭantuten club an hmangaihzia hi ka hrethiam a, Premier League-a club lian dang el pha turin an pawimawh dawn. Player bulah thawhhona ṭha kan ngen dawn a, theihtawp kan chhuah chuan supporter-ten min thlawp em em ang," tiin a sawi.

Hei le, Van de Beek
Manchester United-in Ajax aṭanga pound maktaduai 35 senga kum 2020-a an lak Donny van de Beek hian Old Trafford-ah a theihna angin a la khel chhuak lo a, khel chhuak tur pawhin khelhna hun siamsak a la ni lo.

Tun season Premier League-ah Van de Beek hian bul a la ṭan lo a, minute 69 chiah a inlan chungin goal khat a khung tawh. Dutch midfielder hian Ajax-ah a theihna sang tak a lantir tawh avangin Crystal Palace pawhin lakluh an tum.

Amaherawhchu, Toffees-in Van de Beek an lak theih nan Lampard a pawimawh. Chelsea manager hlui hian Dutch midfielder hi a kawm a, Goodison Park-a kal turin a hmin.

Van de Beek chuan, "Ajax a ka khelh lai khan a kaihhruaina hnuaia khel Chelsea ka hmachhawn a, player anga ka theihna a hria a, team ti chak thei turah min ngai. Kan khelhna position a inang deuh a, chuvangin a hnen aṭang hian thil tam tak ka zir thei ang," tiin Lampard nena an inkawmna chungchang a sawi.

Everton hian loan hmangin Van de Beek hi an la a, Manchester United tana khelhpui Marcus Rashford chuan, "Unaupa, i theihna chu va lantir mawlh rawh," tiin duhsakna a hlan.

Everton-ah Dele Alli
Everton chuan Tottenham Hotspur aṭangin Dele Alli an lalut a, a man hi pound maktaduai 40 a pung chho thei tur a ni. Alli hian Everton tan hian kum hnih leh chanve daih contract a ziak.

English player zinga talent nei ṭha ber zinga an sawi Dele Alli hian nungchang vangin a theihna angin Spurs-ah a khel chhuak lo a, Jose Mourinho hnuaia a tlak tlum loh hnuah Antonio Conte pawhin a chhawr tam tawk lo.

Kum 25 mi Alli hi Conte hnuaiah vawi ruk chiah a la inlan. Alli hian Everton tana vawi 20 a khelh hnuah Toffees-in Spurs hnenah pound maktaduai 10 an pe ang a, a chet ṭhat dan a zirin pek belh zel dawn.

Alli chuan, "Everton kawr ha chunga inkhelh hun ka nghakhlel. Team tana theihtawp chhuah ka duh a, manager thar Frank Lampard nena kan thawk dun tur hi ka lawm," tiin a sawi. English midfielder hian ram tan vawi 37 a khel tawh a, Spurs tan match 269 khelin goal 67 a khungsak a ni.