Transfer tawp niah Newcastle United thawm a ring

Newcastle United-in beisei lawk ang ngeiin January transfer-ah player an zawng nasa a, an duh tak player la vek thei lo mah se thlasik bazarah player hman tlak panga an lalut.

Magpies hian defender Kieran Trippier leh striker Chris Wood te an lak hnuin midfielder Bruno Guimaraes, centre back Dan Burn leh left back Matt Targett te an lalut. Thlasik bazara Newcastle sum hman zat hi a pun lehna tur tiam loin pound maktaduai 85 a ni.

Neitu hausa
Newcastle United hi October thla khan Saudi Public Investment Fund-in neitu pumhlun nihna chu pound maktaduai 305-in an lei a, an hausakna hi pound tluk-lehdingawn 320 vela chhut niin Premier League club zingah an hausa lawr lak.

Magpies ṭantuten club neitu hmasa Mike Ashley chungah beiseina an nei tawh lo a, club neitu thar hian beiseina a rawn siam. Chutihrualin league lamah relegate thei dinhmuna an din avangin hmasawnna a zuang nghal thei lo a, tun season-a an hmachhawp chu Premier League-a inham tan a ni.

Newcastle neitute an hausak avangin manager hming langsar nen sawizawm nghal an ni a, manager ṭanglai Steve Bruce thlakna tur an zawng nghal. Amaherawhchu manager lian ten Magpies sawmna an hnar a, Antonio Conte leh Unai Emery te la thei loin Premier League club tenaua tawnhriat nei tawh Eddie Howe an lalut.

Magpies-in manager lian an lak theih loh ang chiahin player lak kawngah pawh hming langsar tak tak sawi ri mah se player vantlang an lalut. Newcastle hian Jesse Lingard an la thei lo a, player-in chhuah duh mah se Manchester United-in sum an phut tam avangin an la thei lo. Chutiang bawkin Magpies hian Fiorentina striker Dusan Vlahovic leh Sevilla defender Diego Carlos te an la thei lo bawk.

Player thar chu
Newcastle-in Kieran Trippier leh Chris Wood te an chhawr ve ve tawh a, Eddie Howe-a'n player pahnih hi hmun pawimawh a chantir nghal. English manager hian a player lak danah tlarhnung a ngai pawimawh tih a lang.

Transfer tawp nia player lak Dan Burn leh Matt Targett te hi defender ve ve an ni a, Trippier chhiar telin defender pathum a la. Brazilian midfielder Bruno Guimaraes hi defensive midfielder a ni bawk.

Kum 29 mi Burn hian kum hnih leh a chanve daih contract a ziak a, Newcastle-a inzir tawh leh naupan lai aṭanga Magpies ṭantu a ni. Burn hian defence laiah hmun pawimawh a chang nghal thei ang a, Fabian Schar emaw Jamaal Lascelles emawin hmun an ken a rinawm.

Magpies-in left back an nei ṭha tawk lo a, Jamal Lewis, Paul Dummett bakah right back Javier Manquillo te an inchhawr chhawk. Hemi a nih avang hian Villa aṭanga loan hmanga an hawh Matt Targett-a'n bul a ṭan nghal thei ang.

Player thar zinga en châkawm ber leh manto ber chu Bruno Guimaraes a ni a, Eddie Howe pawhin, "Talent nei ṭha tak a ni a, kan team ti chaktu tur a ni. France rama che ṭha ber zinga mi a ni a, Brazil tan a khel pha bawk," tiin a sawi.

Bruno Guimaraes hi midfielder ni mah se tlarhnung ti phui tur zinga mi tho a ni a, Howe-a'n goal khung aia goal venhim a ngai pawimawh hian game hmuhnawm aiin Premier League him dan tura ṭha bera ngaih hmangin thutlukna a siamah a ngaih theih.

Hmabak chu
Newcastle hian match 21 aṭangin point 15 chauh an hmu thei a, table-ah 18-naah an awm mek. Magpies hian February 8, Thawhlehni zanah an elpui Frank Lampard-a enkawl Everton an hmachhawn dawn a, chumi zawhah Steven Gerrard-a kaihhruai Aston Villa nen an inkhel lehnghal dawn.

Howe hote hi international break leh FA Cup aṭanga an tlak tawh avangin inpuahchahna hun ṭha an nei. Transfer-ah sum ṭhahnem tak hmang mah se an player lakte an langsar tawk loh avangin an dinhmun hi teh thiam a la har a, transfer-ah Magpies an che ṭha em tih chu hunin a hril ang.

Player chhuak
Newcastle United midfielder Jeff Hendrick leh Matty Longstaff chu loan hmangin Queens Park Rangers leh Mansfield Town-ah an chhuak. Kum 30 mi Hendrick hian tun season-ah league match vawi li chiah a la khel a, goal khat a khung. Matty Longstaff hi loan hmangin Aberdeen aṭangin a rawn kir chiah a, loan hmang bawkin League Two club-ah a chhuak leh nghal. Matty unaupa Sean Longstaff erawhin senior team-ah hmun pawimawh a chang pha.