Del Potro a inkhel leh dawn

Juan Martin del Potro chu tennis court-ah a lo kir leh dawn. US Open champion hlui hian 2019 June thla hnuah tournament a la khel leh lo, tuna ruahman dan chuan tun thla a khelh tur Argentina Open a khel ang.

Kum 33 mi Del Potro hian training a zawm pangngai leh tawh a, duhsak taka wildcard pek an tumna Buenos Aires leh Rio Open-ah a inlan dawn a, hliam a neih belh a nih loh chuan clay court season a hmang thei tura beisei a ni.

Argentina tlangval hi a vanglai chuan world number 3 a ni phak, tunah erawh a inkhelh loh rei tak em avangin number 757 a ni tawh a, wildcard a hmu lo a nih chuan tournament khel tur pawhin qualifier a khelh zel a ngai dawn.

Rio Olympic silver medalist Del Potro chuan, "Ka tan chuan Buenos Aires leh Rio lam inkhelh leh hi thil chakawm a ni a, ka nuna hmun pawimawh tak chang an nih avangin ka ngaihlu hle," tiin a sawi.

Argentina Open hi February 7 aṭanga khelh a ni dawn; Rio Open pawh February 14 aṭanga khelh a ni ang.